బైక్ ను వెనక నుంచి ఢీ కొట్టిన కారు.. జూబ్లీహిల్స్ లో రోడ్డు ప్రమాదం

హైదరాబాద్ లోని జూబ్లీహిల్స్ పెద్దమ్మ టెంపుల్ సమీపంలో బుధవారం తెల్లవారుజామున ఘోర ప్రమాదం చోటుచేసుకుంది. అతివేగంతో అదుపుతప్పిన ఓ కారు ముందు వెళుతున్న బైక్ ను ఢీ కొట్టింది. ఈ ప్రమాదంలో బైక్ నడుపుతున్న వ్యక్తి అక్కడికక్కడే చనిపోగా వెనక కూర్చున్న వ్యక్తి తీవ్రంగా గాయపడ్డాడు. ప్రమాదం జరిగిన తర్వాత కూడా కారును ఆపకుండా డ్రైవర్ వేగంగా వెళ్లిపోయినట్లు స్థానికులు చెబుతున్నారు. రిజిస్ట్రేషన్ నెంబర్ లేకపోవడంతో ఆ కారు ఎవరిది, ప్రమాదం చేసిన డ్రైవర్ ఎవరనే వివరాలు తెలియరాలేదు. కారు వివరాలు తెలుసుకునేందుకు పోలీసులు సీసీటీవీ కెమెరాల ఫుటేజీలను పరిశీలిస్తున్నారు.

ఈ ప్రమాదంలో చనిపోయిన వ్యక్తిని తారక్ రాం గా గుర్తించినట్లు పోలీసులు చెప్పారు. తారక్ రాం జూబ్లీహిల్స్ లోని ఓ పబ్ లో బౌన్సర్ గా పనిచేస్తున్నాడని వివరించారు. మృతుడికి ఇటీవలే వివాహం జరిగినట్లు తెలుస్తోంది. కాగా, ఈ ప్రమాదంలో గాయపడ్డ యువకుడిని గాంధీ ఆసుపత్రిలో చేర్పించి చికిత్స అందిస్తున్నామని, తారక్ రాం మృతదేహాన్ని పోస్టుమార్టం కోసం తరలించామని జూబ్లీహిల్స్ పోలీసులు తెలిపారు.