Salaar: 'సలార్' రిలీజ్ ట్రైలర్ ఇదిగో... ప్రభాస్ క్యారెక్టర్ పై మరింత క్లారిటీ

ప్రభాస్ అభిమానులు ఎప్పుడెప్పుడా అని ఎదురుచూసిన సలార్: సీజ్ ఫైర్ రిలీజ్ ట్రైలర్ వచ్చేసింది. పలుమార్లు వాయిదా పడుతూ వచ్చిన ఈ థియేట్రికల్ ట్రైలర్ ను చిత్రబృందం ఎట్టకేలకు విడుదల చేసింది. 'ఖాన్సార్' అనే కాల్పనిక నగరం నేపథ్యంలో సలార్ మొదటి పార్ట్ ఉంటుంది.

ఈ చిత్రం నుంచి వచ్చిన అప్ డేట్లు చూసినప్పుడే వయొలెన్స్ పీక్స్ లో ఉంటుందన్న విషయం అర్థమైంది. సలార్ దర్శకుడు ప్రశాంత్ నీల్ గత చిత్రాలు కేజీఎఫ్, కేజీఎఫ్-2 చూసినవారికి ఇదేమీ కొత్త అనిపించదు కానీ, సలార్ లో ఉన్నది ప్రభాస్ కావడంతో అంచనాలు భారీగా ఉన్నాయి. 

ఇప్పుడీ రిలీజ్ వెర్షన్ ట్రైలర్ చూస్తే ప్రభాస్ క్యారెక్టర్ విషయంలో మరికాస్త స్పష్టత వచ్చింది. ప్రభాస్ ఇందులో ఓ మెకానిక్ గా కనిపించనున్నారు. రెంచీలు తిప్పడమే కాదు, తుపాకీ కాల్చడం, పదునైన కత్తులతో విరుచుకుపడడం కూడా తనకు తెలుసని చాటారు.

ట్రైలర్ చివర్లో ఓ ట్విస్ట్ కూడా ఇచ్చారు. ఇద్దరు ప్రాణస్నేహితులు బద్ధశత్రువులుగా మారడమే ఖాన్సార్ కథను మార్చింది అంటూ వాయిస్ ఓవర్ తో చెప్పించారు. దాంతో ఈ చిత్రంపై ఆసక్తి పెరిగేలా చేశారు.

ప్రశాంత్ నీల్ దర్శకత్వంలో ప్రభాస్, శ్రుతిహాసన్ జంటగా సలార్: సీజ్ ఫైర్ చిత్రాన్ని రూపొందించారు. ఈ నెల 22న ఈ చిత్రం వరల్డ్ వైడ్ గా ప్రేక్షకుల ముందుకు వస్తోంది. ఇప్పటికే సెన్సార్ పనులు పూర్తి చేసుకున్న సలార్ మొదటి పార్టుకు A సర్టిఫికెట్ ఇచ్చారు. 

ఇందులో పృథ్వీరాజ్ సుకుమారన్, జగపతిబాబు, టినూ ఆనంద్, ఈశ్వరీరావు, శ్రియా రెడ్డి, గరుడ రామ్ కీలక పాత్రలు పోషించారు. రవి బస్రూర్ సంగీతం అందించారు.