kalvakuntla Sanjay: గుడ్ మార్నింగ్ కోరుట్ల.. నూతన కార్యక్రమాన్ని ప్రారంభించిన బీఆర్ఎస్ ఎమ్మెల్యే
- ప్రజల సమస్యలను తెలుసుకొని... వాటిని పరిష్కరించే ఉద్దేశ్యంలో భాగంగా ప్రారంభించినట్లు వెల్లడి
- మల్లాపూర్ మండలంలో కార్యక్రమం ప్రారంభించన ఎమ్మెల్యే కల్వకుంట్ల సంజయ్
- ప్రతి రోజు ఉదయం ఓ గ్రామానికి వెళ్లి సమస్యలు తెలుసుకుంటానని వెల్లడి
ప్రజల సమస్యలను తెలుసుకొని... వాటిని పరిష్కరించే ఉద్దేశ్యంలో భాగంగా కోరుట్ల ఎమ్మెల్యే డాక్టర్ కల్వకుంట్ల సంజయ్ ఓ నూతన కార్యక్రమానికి శ్రీకారం చుట్టారు. 'గుడ్ మార్నింగ్ కోరుట్ల' పేరుతో నేరుగా ప్రజల వద్దకు వెళ్లి సమస్యలు తెలుసుకుంటున్నారు. బుధవారం ఆయన మల్లాపూర్ మండలంలో పర్యటించారు. ఈ సందర్భంగా ఈ కార్యక్రమాన్ని ప్రారంభించారు. గుడ్ మార్నింగ్ కోరుట్ల కార్యక్రమాన్ని నిరంతరం కొనసాగిస్తానని, రోజుకో గ్రామంలో పర్యటించి ప్రజల సమస్యలను పరిష్కరించడానికి కృషి చేస్తానని చెప్పారు.
ఈ సందర్భంగా కల్వకుంట్ల సంజయ్ మాట్లాడుతూ... ప్రతిరోజు ఉదయం ఓ గ్రామానికి వెళ్లి.. గ్రామంలోని, ప్రతి వార్డులోని సమస్యను తెలుసుకుంటానని చెప్పారు. ఇందులో భాగంగా మల్లాపూర్ గ్రామంలో ఈ కార్యక్రమాన్ని ఈ రోజు ప్రారంభించానని తెలిపారు. చిన్న చిన్న సమస్యలు ఏవైనా తన దృష్టికి వస్తే వెంటనే పరిష్కరించే ప్రయత్నం చేస్తానని తెలిపారు. ఈ కార్యక్రమంతో ప్రజలు ఆనందిస్తున్నారన్నారు. మనం ఓట్ల కోసం ఎలాగైతే ప్రజల వద్దకు వెళ్లామో.. అలాగే ప్రజా సమస్యలను తీర్చడానికి వారి వద్దకు వెళ్తే బాగుంటుందని భావించానన్నారు.
