Joe Root: మరో స్టార్ క్రికెటర్ ఐపీఎల్‌-2024కు దూరం!

టెస్టు మ్యాచులపై దృష్టిపెట్టిన ఇంగ్లండ్ క్రికెటర్ జో రూట్ ఐపీఎల్‌-2024 నుంచి తప్పుకున్నాడు. అతడు ఈ సీజన్‌లో తమ తరపున పాల్గొనడని రాజస్థాన్ రాయల్స్ తాజాగా వెల్లడించింది. ఇటీవల మరో ఇంగ్లండ్ క్రికెటర్ బెన్ స్టోక్స్ కూడా ఐపీఎల్ నుంచి తప్పుకున్న విషయం తెలిసిందే. ఐపీఎల్-2023లో రాజస్థాన్ రాయల్స్ జో రూట్‌ను రూ. కోటి పెట్టి దక్కించుకుంది. 

‘‘చర్చల సందర్భంగా జో తన నిర్ణయాన్ని మాకు చెప్పాడు. ఐపీఎల్-2024లో ఆడనని పేర్కొన్నాడు. జట్టుతో తక్కువ సమయమే ఉన్నా సభ్యులపై అతడు ఎంతో సానుకూల ప్రభావం చూపించాడు’’ అని జట్టు డైరెక్టర్ ఆఫ్ క్రికెట్ కుమార సంగక్కర తెలిపాడు. 

కాగా, జో రూట్ రాక జట్టులోకి యువ క్రీడాకారులకు ఎంతో లాభించిందని రాజస్థాన్ రాయల్స్ ఓ ప్రకటనలో తెలిపింది. ఇక డిసెంబర్ 19న జరగనున్న ఆక్షన్‌లో మంచి బ్యాటర్లను సొంతం చేసుకునేందుకు జట్టు ప్రయత్నిస్తోంది.