Bhagavanth Kesari: 'భగవంత్ కేసరి'లో కూతురు పాత్ర చేయవద్దని చాలామంది చెప్పారు: 'అన్ స్టాపబుల్ 3'లో శ్రీలీల

'ఆహా' ఓటీటీ ఫ్లాట్ ఫామ్ 'అన్ స్టాపబుల్ 3' టాక్ షో సీజన్ 3 మొదలైపోయింది. ఈ టాక్ షోకి సంబంధించిన ఫస్టు ఎపిసోడ్ నిన్న స్ట్రీమింగ్ అయింది. ఫస్టు ఎపిసోడ్ లో 'భగవంత్ కేసరి' టీమ్ సందడి చేసింది. బాలయ్యతో పాటు అనిల్ రావిపూడి .. అర్జున్ రామ్ పాల్ .. కాజల్ .. శ్రీలీల ఈ స్టేజ్ పై ప్రేక్షకులకు కనువిందు చేశారు. 

శ్రీలీల మాట్లాడుతూ .. "బాలకృష్ణగారితో కలిసి పనిచేయడానికి భయపడ్డాను. కానీ ఆ తరువాత ఆయన ఆ భయాన్ని పోగొట్టడంతో ఈజ్ తో చేయగలిగాను. బాలకృష్ణగారు ఎలాంటి ఫిల్టర్ లేకుండా మాట్లాడతారు. ఈ సినిమాలో మంచి మెసేజ్ ఉంది. అలాంటి ఒక సినిమాను చేయడానికి బాలకృష్ణగారు ముందుకు రావడం ఆయన మంచి మనసుకు నిదర్శనం" అని అన్నారు. 

"ఈ సినిమాలో బాలకృష్ణ కూతురిగా చేశాను. 'పెళ్లి సందD' రిలీజ్ తరువాత ఈ ఛాన్స్ వచ్చింది. అప్పుడు చాలామంది కూడా ఈ సమయంలో కూతురు పాత్ర చేయడం మంచిది కాదనే చెప్పారు. కానీ ఇలాంటి ఒక పాత్రను ఇకపై చేసే ఛాన్స్ రాదేమోనని నాకు అనిపించింది. స్క్రిప్ట్ పై ఉన్న నమ్మకంతోనే ఈ సినిమా చేయడానికి ఒప్పుకున్నాను" అని చెప్పారు.