Aadikeshava: మెగా హీరో చిత్రం విడుదల వాయిదా.. కారణం ఏంటంటే..!
- వైష్ణవ్ తేజ్, శ్రీలీల జంటగా నటిస్తున్న ఆదికేశవ
- శ్రీకాంత్ ఎన్. రెడ్డి దర్శకత్వంలో వస్తున్న సినిమా
- నవంబర్ 10న విడుదల చేస్తున్నట్టు చిత్ర బృందం ప్రకటన
మెగా మేనల్లుడు వైష్ణవ్ తేజ్, యువనటి శ్రీలీల జంటగా తెరకెక్కుతున్న చిత్రం ‘ఆదికేశవ’. శ్రీకాంత్ ఎన్.రెడ్డి దర్శకత్వం వహిస్తున్న ఈ సినిమాను సితార ఎంటర్‌టైన్‌మెంట్స్‌, ఫార్చూన్‌ ఫోర్‌ సినిమాస్ సంస్థలు నిర్మిస్తున్నాయి. ఈ సినిమా ఆగస్టు 18న విడుదల కావాల్సి ఉంది. కానీ, షూటింగ్ పూర్తవకపోవడంతో విడుదల వాయిదా పడింది. చిత్రాన్ని నవంబర్ 10వ తేదీన విడుదల చేస్తున్నట్టు చిత్ర బృందం ప్రకటించింది.
ఈ మేరకు సోషల్ మీడియాలో ఓ పోస్టర్ ను షేర్ చేసింది. ఇటీవలే ప్యారిస్‌ లో ఓ షెడ్యూల్ పూర్తి చేసుకున్న ఈ సినిమాలో ఇంకా కొంత భాగం చిత్రీకరణ మిగిలింది. దాన్ని పూర్తి చేసి పోస్ట్ ప్రొడక్షన్ పనులు మొదలు పెట్టనున్నారు. పూర్తి యాక్షన్ ఎంటర్‌‌టైనర్‌‌గా తెరకెక్కుతున్న ఈ చిత్రంలో వైష్ణవ్ తేజ్ రుద్ర కాళేశ్వర్ రెడ్డి పాత్రలో మాస్ లుక్‌లో కనిపించనున్నాడు. మలయాళ నటుడు జోజు జార్జ్, అపర్ణా దాస్, రాధిక కీలక పాత్రలు పోషిస్తున్నారు. జీవీ ప్రకాష్ కుమార్ సంగీతం అందిస్తున్నాడు.
