చంద్రుడి ఉపరితలాన్ని దగ్గరగా చూశారా? చంద్రయాన్-3 పంపిన వీడియో ఇదిగో

చంద్రయాన్ -3 కీలక దశకు చేరుకుంది. చంద్రుడి కక్ష్యలోకి విజయవంతంగా అడుగు పెట్టింది. చంద్రయాన్ -3 చంద్రుడి ఉపరితలాన్ని చాలా సమీపం నుంచి తీసిన చిత్రాలను, వీడియోని భారతీయ అంతరిక్ష పరిశోధనా సంస్థ విడుదల చేసింది. ‘‘ఆగస్ట్ 5న చంద్రుడి కక్ష్యలోకి చంద్రయాన్ -3 అంతరిక్ష నౌక ప్రవేశించిన సందర్భంగా తీసిన చిత్రాలు’’అని ఇస్రో పేర్కొంది.

కక్ష్య కుదింపునకు ముందు ఇస్రో వీడియోని విడుదల చేయడం గమనార్హం. శనివారం రాత్రి 7 గంటలకు చంద్రుడి కక్ష్యలోకి చంద్రయాన్-3ని ప్రవేశపెట్టినట్టు అంతకుముందు ఇస్రో ప్రకటించడం తెలిసిందే. ఈ ఉపగ్రహ ప్రయోగాన్ని జులై 14న షార్ నుంచి ప్రయోగించారు. ఇప్పటి వరకు మూడు లక్షల కిలోమీటర్ల మేర అది ప్రయాణించింది. చంద్రయాన్ పంపిన చిత్రాలు, వీడియోని పరిశీలిస్తే చంద్రుడి ఉపరితలం తెల్లని మంచు ముద్ధ మాదిరిగా, గోతుల మయంగా కనిపిస్తోంది.