Matka: మట్కా... కరుణ కుమార్ దర్శకత్వంలో వరుణ్ తేజ్ కొత్త చిత్రం టైటిల్ ఇదే!

పలాస ఫేమ్ కరుణకుమార్ దర్శకత్వంలో మెగా ప్రిన్స్ వరుణ్ తేజ్ కొత్త చిత్రం టైటిల్ ఫిక్సయిపోయింది. ఈ చిత్రానికి మట్కా అనే పేరును చిత్రబృందం నేడు అనౌన్స్ చేసింది. టైటిల్ లుక్ చూస్తుంటే 1970ల నాటి గ్యాంబ్లింగ్ నేపథ్యంతో కూడిన కథ అని తెలుస్తోంది. ఇందులో ఆ నాటి కారు, 1975లో ముద్రితమైన రూపాయి బొమ్మ చూడొచ్చు. 

వైరా ఎంటర్టయిన్ మెంట్స్ బ్యానర్ పై రూపుదిద్దుకుంటున్న ఈ చిత్రం...  హైదరాబాద్ లో నేడు లాంఛనంగా పూజా కార్యక్రమాలు జరుపుకుంది. హీరో వరుణ్ తేజ్ సహా చిత్ర యూనిట్ సభ్యులు ఈ కార్యక్రమంలో పాల్గొన్నారు. 

ఓ సరికొత్త ప్రపంచానికి ప్రారంభం అంటూ దర్శకుడు కరుణ కుమార్ సోషల్ మీడియాలో టైటిల్ లుక్ ను పంచుకున్నారు. ఈ చిత్రం తెలుగు, తమిళ్, కన్నడ, హిందీ, మలయాళ భాషల్లో తెరకెక్కనుంది. 

ఇందులో వరుణ్ తేజ్ సరసన మీనాక్షి చౌదరి కథనాయిక కాగా, బాలీవుడ్ ముద్దుగుమ్మ నోరా ఫతేహి కూడా ఈ చిత్రంలో నటిస్తున్నట్టు చిత్రబృందం నిన్ననే వెల్లడించింది. ఏఆర్ రెహమాన్ మేనల్లుడు జీవీ ప్రకాశ్ కుమార్ మట్కా చిత్రానికి సంగీతం అందిస్తున్నాడు. మోహన్ చెరుకూరి, డాక్టర్ విజేందర్ రెడ్డి తీగల ఈ సినిమాకు నిర్మాతలు.