Rajamouli: మహేశ్ సినిమా కోసం ముగ్గురు బాలీవుడ్ స్టార్లను దింపనున్న జక్కన్న!

‘ఆర్ఆర్ఆర్’ చిత్రంతో తెలుగు సినిమా ఖ్యాతిని ప్రపంచానికి చాటిన దర్శక దిగ్గజం రాజమౌళి. అంతటి అఖండ విజయం సాధించిన తర్వాత ఆయన తీయబోయే తదుపరి సినిమా ఏ రేంజ్‌లో ఉంటుందా అని ప్రతీ ఒక్కరు ఎదురు చూస్తున్నారు. టాలీవుడ్ సూపర్ స్టార్ మహేశ్ బాబుతో ఓ అడ్వెంచర్‌‌ డ్రామా తీయబోతున్నట్టు రాజమౌళి ప్రకటించారు. ఆగస్టు 9న మహేశ్ పుట్టినరోజు సందర్భంగా ఈ భారీ ప్రాజెక్ట్‌ను ప్రారంభించే అవకాశం కనిపిస్తోంది. ప్రస్తుతం స్ర్కిప్టు పనులు జరుగుతున్నాయి. ఈ సినిమా హాలీవుడ్ రేంజ్ లో ఉంటుందని రచయిత విజయేంద్ర ప్రసాద్ చెప్పారు. అందుకు తగ్గట్టుగానే నటీనటులను ఎంపిక చేసే పనిలో రాజమౌళి ఉన్నట్టు తెలుస్తోంది. 

ఇక ఈ చిత్రంలో ముగ్గురు హీరోయిన్లు ఉంటారని తెలుస్తోంది. అలాగే, కీలక పాత్రల కోసం ముగ్గురు బాలీవుడ్ నటులను తీసుకుంటారని తాజా సమాచారం. ‘ఆర్ఆర్ఆర్’ కోసం ఓ హీరోయిన్‌గా ఆలియా భట్ తో పాటు అజయ్ దేవగణ్ ను తీసుకున్న జక్కన్న ఈసారి ఎవరికి అవకాశం ఇస్తారనేది ఆసక్తిగా మారింది. ప్రస్తుతం మహేశ్.. త్రివిక్రమ్ దర్శకత్వంలో ‘గుంటూరు కారం’ చిత్రంలో నటిస్తున్నారు. ఈ సినిమా తర్వాత రాజమౌళి చిత్రంకోసం మేకోవర్ కానున్నారు. ప్రత్యేకంగా మూడు నెలల పాటు మిక్స్డ్ మార్షల్ ఆర్ట్స్‌లో ఆయన శిక్షణ తీసుకుంటారని తెలుస్తోంది.