Viral Videos: మామిడిపళ్ల కోసం తన్నుకున్న జనం.. పైగా లండన్‌ నగరంలో!

మామిడిపండ్లు ఇష్టపడని వారు వుండరు. ఎంత రేటైనా సరే కొనుక్కుని సీజన్ లో వాటిని ఓ పట్టుపడతారు. అయితే, ఇలాంటి మామిడి పండ్ల కోసం తన్నుకున్న సంఘటన ఒకటి తాజాగా చోటుచేసుకుంది. పైగా ఇది లండన్ మహానగరంలో జరగడం ఇక్కడ విశేషం! దీనికి సంబంధించిన వీడియో ఒకటి ప్రస్తుతం నెట్టింట్లో వైరల్ అవుతోంది. 

ఈ వీడియోలో కొందరు మామిడి పళ్లు చేజిక్కించుకునే ప్రయత్నంలో ఒకరిపై మరొకరు దాడికి దిగారు. చేతికి అందిన వస్తువులతో కొట్టుకునే ప్రయత్నం చేశారు. ఓ మహిళ కూడా తగ్గేదేలేదంటూ ఈ గొడవలోకి దిగింది. అవతలి వ్యక్తిని అమాంతం తోసేసింది. గొడవ జరుగుతున్న ప్రాంతంలో నేల తడిగా ఉండటంతో కొందరు జారి పడ్డారు కూడా. 

నెట్టింట వైరల్ అవుతున్న ఈ వీడియోను చూసి నెటిజన్లు ముక్కున వేలేసుకుంటున్నారు. లండన్‌లో ఇది జరిగిందని తెలిసి మరింత ఆశ్చర్యానికి లోనవుతున్నారు. ‘‘మామిడి పళ్ల కోసం ఇంతగా తన్నుకుంటున్నారంటే ఆ మహానగరాన్ని దేవుడే కాపాడాలి’’ అంటూ కామెంట్స్ పెడుతున్నారు.