SRH: ఢిల్లీ క్యాపిటల్స్ తో సన్ రైజర్స్ పోరు... టాస్ అయితే గెలిచారు!

గతవారం ఢిల్లీ క్యాపిటల్స్ చేతిలో సొంతగడ్డపై ఓడిపోయిన సన్ రైజర్స్ హైదరాబాద్ ముందు ప్రతీకారం తీర్చుకునే అవకాశం నిలిచింది. ఇవాళ ఢిల్లీలోని అరుణ్ జైట్లీ స్టేడియంలో ఢిల్లీ క్యాపిటల్స్, సన్ రైజర్స్ హైదరాబాద్ జట్లు తలపడుతున్నాయి. ఈ మ్యాచ్ లో టాస్ గెలిచిన సన్ రైజర్స్ బ్యాటింగ్ ఎంచుకుంది. 

వాషింగ్టన్ సుందర్ గాయంతో జట్టుకు దూరమైన నేపథ్యంలో, సన్ రైజర్స్ తరఫున వెస్టిండీస్ బౌలర్ అకీల్ హోసీన్ ఈ మ్యాచ్ తో అరంగేట్రం చేస్తున్నాడు. హార్డ్ హిట్టర్ అబ్దుల్ సమద్ కూడా జట్టులోకి వచ్చాడు. ఇక, వరుసగా విఫలమవుతున్న ఖరీదైన ఆటగాడు హ్యారీ బ్రూక్ ను బ్యాటింగ్ ఆర్డర్ లో దిగువన పంపించాలని నిర్ణయించారు. ఈ మ్యాచ్ లో ఓపెనర్లుగా అభిషేక్ శర్మ, మయాంక్ అగర్వాల్ బరిలో దిగారు. 

సన్ రైజర్స్ ఈ టోర్నీలో ఇంకా 7 మ్యాచ్ లు ఆడాల్సి ఉండగా, ఇకపై ప్రతీ మ్యాచ్ చావోరేవో కానుంది. ఇప్పటికే 2 విజయాలే నమోదు చేసిన సన్ రైజర్స్, మిగిలిన మ్యాచ్ ల్లో కనీసం 5 విజయాలు సాధిస్తేనే ప్లేఆఫ్ దశపై ఆశలు పెట్టుకోగలుగుతుంది.