Tamilnadu: టవల్‌తో ఉరివేసుకుని ఆత్మహత్య చేసుకున్న 9 ఏళ్ల 'ఇన్‌స్టా క్వీన్‌'!

తండ్రి చదువుకోమన్నందుకు తీవ్ర ఆగ్రహానికి లోనైన ఓ 9 ఏళ్ల బాలిక విచక్షణ మరిచి ఆత్మహత్యకు పాల్పడింది. తమిళనాడులోని తిరువల్లూర్‌ జిల్లాలో సోమవారం జరిగిన ఈ ఘటన కలకలం రేపుతోంది. స్థానికంగా నివసించే కృష్ణమూర్తికి 9 ఏళ్ల వయసున్న ఓ కూతురు ఉంది. ఇన్‌స్టాగ్రామ్‌లో నిత్యం యాక్టివ్‌గా ఉండే బాలికను చుట్టుపక్కల వారు ఇన్‌స్టా క్వీన్ అని పిలుస్తుంటారు. 

ఇదిలా ఉంటే.. సోమవారం బాలిక తన అమ్మమ్మ ఇంటి వద్ద ఆడుకుంటోంది. ఇది గమనించిన తండ్రి..ఆటలు ఆపి వెళ్లి చదువుకోవాలని బాలికకు సూచించారు. తమ ఇంటి తాళాలు కూడా బాలికకు ఇచ్చి పంపించారు. ఆ తరువాత ఆయన తన బైక్ తీసుకుని పెట్రోల్ నింపుకునేందుకు వెళ్లారు. 

రాత్రి 8.15 గంటలకు ఇంటికి వెళ్లిన ఆయన..తలుపులు కొట్టగా బాలిక ఎంతకీ స్పందించలేదు. దీంతో కంగారు పడిపోయిన కృష్ణమూర్తి తలుపులు పగలగొట్టి లోపలికెళ్లగా.. బాలిక ఉరివేసుకుని వేలాడుతూ కనిపించింది. అచేతన స్థితిలో ఉన్న చిన్నారిని వెంటనే ఆసుపత్రికి తరలించగా చికిత్స పొందుతూ మృతి చెందింది. ఈ ఘటనతో స్థానికంగా విషాదం నెలకొంది.