Srikanth Rathod: రేపు రిలీజ్ అవుతున్న 'తుపాకుల గూడెం'
- ఫారెస్టు నేపథ్యంలో నడిచే 'తుపాకుల గూడెం'
- కొత్త నటీనటులతో చేసిన ప్రయోగం
- ఆసక్తిని రేపుతూ వచ్చిన అప్ డేట్స్
- మణిశర్మ సంగీతమే ప్రత్యేక ఆకర్షణ
- రేపు విడుదలవుతున్న సినిమా
అడవి నేపథ్యంలో నడిచే కథలతో ఇంతకుముందు చాలానే సినిమాలు వచ్చాయి. అలాంటి ఒక నేపథ్యంలో వచ్చిన మరో సినిమానే 'తుపాకుల గూడెం'. అయితే దీని లైన్ వేరు .. ట్రీట్మెంట్ వేరు. టైటిల్ కి తగినట్టుగానే ఈ సినిమాలో తుపాకులు కనిపిస్తుంటాయి .. కాల్పులు వినిపిస్తుంటాయి. రేపు ఈ సినిమా ప్రేక్షకుల ముందుకు రానుంది.
ఈ సినిమా టీజర్ కీ .. ట్రైలర్ కి మంచి రెస్పాన్స్ వచ్చింది. ఒక వైపున ఫారెస్టులో కలపను అక్రమంగా తరలించడం .. మరో వైపున నక్సలిజం నేపథ్యంలో ఈ కథ నడుస్తుందనే విషయం అర్ధమైపోతోంది. ఈ మధ్యలో చిన్నపాటి ప్రేమ వ్యవహారం కూడా ఉందనే విషయం స్పష్టమవుతోంది.
కలప అక్రమ వ్యాపారం చేసే రాజన్న దగ్గర, తుపాకుల గూడానికి చెందిన కుమార్ అనే యువకుడు పనిచేస్తూ ఉంటాడు. అతను చేసిన ఒక పనివలన ఆ ఊరు ఎలాంటి ప్రమాదంలో పడిందనేదే కథ. శ్రీకాంత్ రాథోడ్ .. జయేత్రి .. ప్రవీణ్ .. శివరామరెడ్డి ప్రధానమైన పాత్రలను పోషించిన ఈ సినిమాకి మణిశర్మ సంగీతం హైలైట్ గా నిలవనుంది.
