kaikala: ఎన్టీఆర్‌కు తాతగా నటించి మెప్పించిన కైకాల
- 'మనుషులంతా ఒక్కటే' సినిమాలో పాత్ర కోసం కైకాలను అడిగిన దాసరి
- ఆ పాత్రకు న్యాయం చేయలేననే భయంతో వద్దన్న కైకాల
- ఎన్టీఆర్ తో చెప్పించి, దాసరి తనను ఒప్పించారని ఓ ఇంటర్వ్యూలో వెల్లడి
తెరపైన యముడి పాత్రకు ప్రత్యామ్నాయంగా కనిపించిన కైకాల సత్యనారాయణ సీనియర్ ఎన్టీఆర్ కు తాతగా నటించి మెప్పించారు. ఎన్టీఆర్ తో దాసరి నారాయణరావు తొలి సినిమా ‘మనుషులంతా ఒక్కటే’. ఇందులో ఎన్టీఆర్ ద్విపాత్రాభినయం చేశారు. ఈ సినిమాలో ఆయనకు తండ్రిగా, తాతగా కైకాల నటించారు. అయితే, తొలుత ఈ పాత్ర కోసం దాసరి తనను అడిగితే కాదన్నట్లు కైకాల స్వయంగా ఓ ఇంటర్వ్యూలో వెల్లడించారు. ఎన్టీఆర్ కు తాతగా నటించి ప్రేక్షకులను మెప్పించగలనా అనే సందేహంతో వద్దన్నట్లు చెప్పారు.
అయితే, పట్టువిడవని దాసరి నారాయణరావు ఈ విషయాన్ని ఎన్టీఆర్ దృష్టికి తీసుకెళ్లారట. దీంతో కైకాలను పిలిపించిన ఎన్టీఆర్.. ఆ వేషం నువ్వు వేస్తావా? లేక కథ మార్చమంటావా? అని అడిగారట. ఎన్టీఆర్ కంఠంలోని సీరియస్‌ నెస్‌ని గమనించి కంగారుపడి ఒప్పుకున్నానని కైకాల చెప్పారు. గతంలో తనను ప్రోత్సహించి, ఎదుగుదలకు మార్గం చూపిన వ్యక్తి అడగడంతో మారుమాట్లాడలేదని ఆ ఇంటర్వ్యూలో వెల్లడించారు. ఆ పాత్రను ఛాలెంజ్ గా తీసుకుని నటించానని, అందులో 'తాతా బాగున్నావా?' అనే పాట అప్పట్లో సూపర్ హిట్ గా నిలిచిందని చెప్పారాయన.
