Allu Arjun: జీక్యూ 'లీడింగ్ మ్యాన్ ఆఫ్ ఇండియా' అవార్డు అందుకున్న అల్లు అర్జున్

టాలీవుడ్ ఐకాన్ స్టార్ అల్లు అర్జున్ పుష్ప చిత్రం ద్వారా కెరీర్ లోనే బిగ్గెస్ట్ హిట్ ను ఖాతాలో వేసుకున్నాడు. పాన్ ఇండియా స్థాయిలో పుష్ప సృష్టించిన క్రేజ్ అంతాఇంతా కాదు. ఈ సినిమాలో అల్లు అర్జున్ గడ్డం కింద చేయి పెట్టి 'తగ్గేదే లే' అనే మేనరిజమ్ ను అంతర్జాతీయ సెలబ్రిటీలు, క్రీడాకారులు సైతం అనుకరించారంటే బన్నీ ఏ రేంజిలో ఆకట్టుకున్నాడో అర్థమవుతుంది. 

ఈ నేపథ్యంలో బన్నీని ఓ విశిష్ట పురస్కారం వరించింది. జీక్యూ మ్యాగజైన్ ప్రతి ఏడాది అందించే జీక్యూ లీడింగ్ మ్యాన్ ఆఫ్ ద ఇయర్ అవార్డు... 2022 సంవత్సరానికి గాను అల్లు అర్జున్ కు దక్కింది. మెన్ ఆఫ్ ద ఇయర్ కేటగిరీలో బన్నీ అగ్రస్థానంలో నిలిచాడు. జీక్యూ లీడింగ్ మ్యాన్ అవార్డు గతంలో మరే తెలుగు నటుడికీ దక్కలేదు. హైదరాబాదులో నిర్వహించిన ఓ ఈవెంట్ లో అల్లు అర్జున్ ఈ అవార్డును అందుకున్నాడు.  

దీనిపై అల్లు అర్జున్ ఇన్ స్టాగ్రామ్ లో స్పందించాడు. ఈ అవార్డుకు తనను ఎంపిక చేసినందుకు జీక్యూ ఇండియా సంస్థకు కృతజ్ఞతలు తెలుపుకుంటున్నానని పేర్కొన్నాడు. జీక్యూ మ్యాగజైన్ కవర్ పేజీపై తన ఫొటో ఉండడాన్ని గౌరవంగా భావిస్తున్నానని తెలిపాడు. తన లక్ష్యాల జాబితాలో మరొకదాన్ని సాధించానని బన్నీ పేర్కొన్నాడు. 

కాగా, ఈ అవార్డును అందించేందుకు జీక్యూ టీమ్ హైదరాబాదుకే తరలిరావడం విశేషం. ఈ అవార్డు కార్యక్రమం అనంతరం తాజ్ ఫలక్ నుమా ప్యాలెస్ లో గ్రాండ్ గా పార్టీ ఏర్పాటు చేశారు.