సహజీవనంపై ఇండోనేసియా నిషేధం.. ఉల్లంఘిస్తే జైలుకే!

వివాహేతర సంబంధాలు, సహజీవనంపై ఇండోనేసియా ప్రభుత్వం కఠిన నిర్ణయం తీసుకుంది. ఈ రెండింటినీ నిషేధిస్తూ తీసుకొచ్చిన బిల్లుకు నిన్న పార్లమెంటు ఆమోదం తెలిపింది. ఈ కొత్త చట్టం ప్రకారం వివాహేతర సంబంధాలను నేరంగా పరిగణిస్తారు. ఉల్లంఘిస్తే ఏడాది జైలు శిక్ష విధిస్తారు. అలాగే, పెళ్లి చేసుకోకుండా కలిసి ఉంటే (సహజీవనం) ఆరు నెలల జైలు శిక్ష తప్పదు. ఈ కొత్త బిల్లుకు అన్ని పార్టీలు ఆమోదం తెలిపాయి. 

బిల్లు ఆమోదం పొందిన అనంతరం న్యాయ, మానవహక్కుల మంత్రి యసొన్నా లాలోరి మాట్లాడుతూ..  అనేకమంది అభిప్రాయాలు, కీలకమైన అంశాలపై సుదీర్ఘంగా చర్చించామని, అన్ని అంశాలను పరిశీలించిన తర్వాతే  ఈ నిర్ణయం తీసుకున్నట్టు చెప్పారు. అయితే, ప్రభుత్వం తీసుకున్నఈ నిర్ణయంపై దేశంలో వ్యతిరేకత వ్యక్తమవుతోంది. 

వివాహేతర శృంగారంపై నిషేధం పర్యాటక రంగంపై తీవ్ర ప్రభావం చూపుతుందని వ్యాపారులు మండిపడుతున్నారు. అయితే, ఇండోనేసియాకు వచ్చే విదేశీయులపై మాత్రం కొత్త చట్టం వర్తించదని అధికారులు చెబుతున్నారు. ఇండోనేసియాలో ప్రపంచంలోనే అత్యధికంగా ముస్లిం జనాభా ఉంది. ఇప్పటికే ఇక్కడ స్వలింగ సంపర్కంపై నిషేధం ఉంది.

మరోవైపు, ఈ కొత్తచట్టంపై అక్కడి హక్కుల సంఘాలు మండిపడుతున్నాయి. ఇది పౌర హక్కుల అణచివేత తప్ప మరోటి కాదని ఆగ్రహం వ్యక్తం చేస్తున్నాయి. కాగా, ఈ చట్టానికి ఇండోనేసియా అధ్యక్షుడు జోకో విడోడో ఆమోదం తెలపాల్సి ఉంది. ఆయన ఆమోదం తెలిపిన మూడేళ్లకు ఈ చట్టం అమల్లోకి వస్తుంది.