Adivi Sesh: 'హిట్ 3'లోను నేను ఉండాలి: కోమలి ప్రసాద్

అడివి శేష్ - శైలేశ్ కొలను కాంబినేషన్లో రూపొందిన 'హిట్ 2' సినిమా, ఈ నెల 2వ తేదీన ప్రేక్షకుల ముందుకు వచ్చింది. నాని సొంత బ్యానర్లో నిర్మితమైన ఈ సినిమా, మర్డర్ మిస్టరీ నేపథ్యంలో సాగే థ్రిల్లర్. మీనాక్షి చౌదరి కథానాయికగా నటించిన ఈ సినిమాలో రావు రమేశ్ కీలకమైన పాత్రను పోషించాడు. తొలిరోజునే ఈ సినిమా ప్రపంచవ్యాప్తంగా 11.27 కోట్ల గ్రాస్ ను వసూలు చేసింది. 

ఈ నేపథ్యంలో 'బ్లాక్ బస్టర్ సెలబ్రేషన్స్' పేరుతో ఈ సినిమా టీమ్ ఈవెంటును నిర్వహించింది. ఈ సినిమాలో పోలీస్ ఆఫీసర్ గా ఉన్న అడివి శేష్ కి సహాయకారిగా కోమలీ ప్రసాద్ నటించింది. ఆమె పోషించిన 'వర్ష' పాత్రకి మంచి మార్కులే దక్కాయి.  ఈ సెలబ్రేషన్స్ లో కోమలి ప్రసాద్ మాట్లాడింది. 

"ఈ సినిమాకి థియేటర్స్ లో వస్తున్న రెస్పాన్స్ చూశాను. ఇలాంటి ఒక సినిమాలో చేసినందుకు నాకు చాలా హ్యాపీగా అనిపించింది. ఈ జోనర్ ఫిలిమ్స్ శేష్ ఎక్కువగా చేసి ఉండటం వలన, ఆయన నాకు ఎంతో సపోర్ట్ చేశారు. అందువల్లనే 'వర్ష' పాత్రను అంత బాగా చేయగలిగాను. 'హిట్ 3'లో కూడా 'వర్ష' ఉండాలని కోరుకుంటున్నాను. ఉంటానని నానిగారు చెబితే బాగుంటుంది" అంటూ ముగించింది.