AP Govt: ఏపీ ప్రభుత్వానికి టైమ్స్ ఆఫ్ ఇండియా పురస్కారం

గత కొంతకాలంగా ఏపీ ప్రభుత్వం జాతీయస్థాయిలో పలు అవార్డులు అందుకుంటోంది. తాజాగా, ఏపీ ప్రభుత్వాన్ని టైమ్స్ ఆఫ్ ఇండియా గ్రూప్ అవార్డు వరించింది. పోర్టు ఆధారిత మౌలిక సదుపాయాల అభివృద్ధి విభాగంలో ఈ అవార్డు ఏపీకి లభించింది. నీతి ఆయోగ్ సలహాదారు సుదేందు.జె.సిన్హా నేతృత్వంలోని జ్యూరీ ఈ పురస్కారానికి ఏపీని ఎంపిక చేసింది. పోర్టు ఆధారిత మౌలిక వసతుల విభాగంలో ఏపీ దేశంలోనే అగ్రగామిగా నిలిచింది. ఈ అవార్డును ఏపీ మంత్రి గుడివాడ అమర్ నాథ్ అందుకోనున్నారు. ఈజ్ ఆఫ్ డూయింగ్ గవర్నెన్స్, పోలీసింగ్ విభాగాల్లో ఏపీకి ఇప్పటికే అవార్డులు దక్కడం తెలిసిందే.