ఈ రోజు క‌ట్నం లేకుండా జ‌రిగిన ఓ పెళ్లికి సాక్షి సంత‌కం పెట్టా: బీఎస్పీ నేత ఆర్ఎస్ ప్ర‌వీణ్‌ కుమార్

ఐపీఎస్ స‌ర్వీస్‌కు స్వ‌చ్ఛంద ప‌ద‌వీ విర‌మ‌ణ చేసి తెలంగాణ‌ రాజ‌కీయాల్లోకి వ‌చ్చిన బీఎస్పీ తెలంగాణ అధ్య‌క్షుడు ఆర్ఎస్ ప్ర‌వీణ్ కుమార్ స‌రికొత్త దిశ‌గా అడుగులు వేస్తున్నారు. పాద‌యాత్ర పేరిట తెలంగాణ‌ను చుట్టేస్తున్న ప్ర‌వీణ్‌... శుక్ర‌వారం ఓ ఆస‌క్తిక‌ర అంశాన్ని వెల్ల‌డిస్తూ ట్వీట్ చేశారు. జ‌డ్చ‌ర్ల‌లో క‌ట్నం లేకుండా జ‌రిగిన ఓ వివాహ వేడుక‌కు హాజ‌ర‌య్యాన‌ని చెప్పిన ప్ర‌వీణ్‌... ఆ వివాహానికి సాక్షిగా సంత‌కం కూడా చేశాన‌ని వెల్ల‌డించారు. 

ఈ సంద‌ర్భంగా తాను మొద‌లుపెట్టిన స్వేరో ఉద్య‌మాన్ని కూడా ఆయ‌న ప్ర‌స్తావించారు. తాను హాజ‌రైన వివాహంలో స్వేరో ఉద్య‌మంలో భాగ‌స్వాములుగా ఉన్న యువ‌తీ యువ‌కులే పెళ్లి చేసుకున్నార‌ని తెలిపారు. ఈ వివాహాన్ని స్వేరో వివాహంగా పేర్కొన్న ఆయ‌న స్వేరో వివాహాల్లో వ‌ర‌క‌ట్నం నిషేధం అని తెలిపారు. వ‌ర‌క‌ట్నం లేకుండానే జ‌రిగిన ఈ పెళ్లికి తాను సాక్షిగా సంత‌కం పెట్టాన‌ని ఆయ‌న వెల్ల‌డించారు. ఈ సంద‌ర్భంగా నూత‌న వ‌ధూవ‌రులిద్ద‌రి మ‌ధ్య నిల‌బ‌డి సాక్షి సంత‌కం పెడుతున్న త‌న ఫొటోను త‌న ట్వీట్‌కు ఆయ‌న జ‌త చేశారు.