Saudi Arabia: బైడెన్, కమలా హ్యారిస్ పై సౌదీ ప్రభుత్వ మీడియా వ్యంగ్య షో.. ఇదిగో వీడియో

ప్రస్తుతం ప్రపంచంలో హాట్ టాపిక్స్ ఏంటంటే.. అందరికీ ముందు గుర్తొచ్చేది ఉక్రెయిన్ పై రష్యా యుద్ధమే. లేదులేదంటూనే తన పొరుగునున్న చిన్న దేశంపై దండయాత్రకు కదిలిపోయింది రష్యా సైన్యం. అన్ని దేశాలూ రష్యా అధ్యక్షుడు వ్లాదిమిర్ పుతిన్ పై దుమ్మెత్తిపోశాయి. అమెరికా ఆంక్షలను విధించింది. 

అయితే, అవన్నీ పక్కనపెడితే.. ఇప్పుడు సౌదీ అరేబియా ప్రభుత్వానికి చెందిన మీడియా సంస్థ ‘ఎంబీసీ’ అమెరికా అధ్యక్షుడు జో బైడెన్, ఉపాధ్యక్షురాలు కమలా హ్యారిస్ పై చేసిన వ్యంగ్య షో వీడియో అందరినీ నవ్వుల్లో ముంచెత్తుతోంది. బైడెన్ ను ఓ గందరగోళ, మతిమరుపు అధ్యక్షుడిగా చూపించిన ఆ వ్యంగ్య షో.. సోమవారం ప్రసారమైంది. ఆ చానెల్ లో సౌదీ ప్రభుత్వానికే మెజారిటీ వాటా ఉండడం విశేషం. 

ఆ షో ప్రకారం బైడెన్, కమలా హారిస్ లు.. ఉక్రెయిన్ యుద్ధ పరిస్థితులపై మీడియాతో మాట్లాడేందుకు వస్తారు. ఆ క్రమంలోనే మాట్లాడే పోడియంను దాటి బైడెన్ ముందుకెళ్లిపోతారు. వెంటనే కమలా హారిస్ ఆయన్ను వెనక్కు తీసుకొచ్చేస్తుంది. 

అయితే, ప్రసంగాన్ని మొదలుపెట్టగానే రష్యాకు బదులు స్పెయిన్, ఆఫ్రికా అని బైడెన్ వేషధారి అంటాడు. ఆయన తప్పులను పక్కనే ఉన్న కమల వేషధారి సవరిస్తుంటుంది. రష్యా అధ్యక్షుడి పేరు కూడా తెలియదన్నట్టుగా బైడెన్ పాత్రను రూపొందించారు. 

అంతేకాదు.. కమలా హ్యారిస్ ను పట్టుకుని ‘ఫస్ట్ లేడీ’ అని బైడెన్ పాత్ర అనడం ఆ షోకే హైలైట్. ఇంకో హైలైట్ ఏంటంటే.. పుతిన్ కు ఓ మాట చెప్పాలనుకుంటున్నా అంటూనే బైడెన్ పాత్ర నిద్రలోకి ఉపక్రమిస్తుంది. ఈ వీడియోపై మీరూ ఓ లుక్కేయండి.