Kushboo: తప్పు జరుగుతోందని తెలిసినా, ఆరేళ్లు మౌనంగా ఉండిపోయా: ఖుష్బూ

కాంగ్రెస్ లో ఉన్నంత కాలమూ, తప్పు జరుగుతోందని తెలిసినా, ఆరేళ్ల పాటు మౌనంగా ఉన్నానని, ఇప్పుడు మాత్రం తాను ప్రజల మధ్య ఉన్నానని, తప్పు జరిగితే సొంత పార్టీనైనా నిలదీస్తానని నటి, బీజేపీ నేత ఖుష్బూ వ్యాఖ్యానించారు. తాజాగా ఓ తమిళ పత్రికకు ఇంటర్వ్యూ ఇస్తూ, రాష్ట్రంలో త్వరలో జరగనున్న అసెంబ్లీ ఎన్నికల్లో పోటీ చేసేందుకు తనకు అవకాశం లభిస్తే చాలా సంతోషిస్తానని ఆమె అన్నారు.

ప్రస్తుతం దేశమంతా మోదీ హవా కొనసాగుతోందని అన్నారు. తమిళనాడులో బీజేపీ లేదని, చెన్నై దాటితే ఆ పేరు వినిపించదంటున్న మాటలో నిజం లేదని అన్నారు. ఇటీవల బీజేపీ ఆధ్వర్యంలో జరిగిన వేల్ రథయాత్ర రాష్ట్రంలో ఎంత విజయవంతం అయిందో అందరూ చూశారని అన్నారు. రానున్న ఎన్నికల్లో ఈ విషయం అందరికీ తెలుస్తుందని వ్యాఖ్యానించారు. కాగా, ఖుష్బూ చెన్నై నగరంలోని ట్రిప్లికేన్ అసెంబ్లీ  నియోజకవర్గం నుంచి పోటీ చేస్తారని తెలుస్తోంది.