కేన్ విలియమ్సన్ సన్ రైజర్స్ తోనే ఉంటాడు: కెప్టెన్ వార్నర్ స్పష్టీకరణ

ఐపీఎల్ లో సన్ రైజర్స్ ప్రస్థానంలో కీలక పాత్ర పోషించే న్యూజిలాండ్ ఆటగాడు కేన్ విలియమ్సన్ వచ్చే సీజన్ లో మరో జట్టుకు ఆడతాడని వార్తలు వస్తున్నాయి. ఇదే అంశాన్ని ఓ అభిమాని సన్ రైజర్స్ కెప్టెన్ డేవిడ్ వార్నర్ దృష్టికి తీసుకెళ్లాడు. ఆ అభిమానికి వార్నర్ బదులిస్తూ, కేన్ విలియమ్సన్ ఎక్కడికీ వెళ్లడని, సన్ రైజర్స్ తోనే ఉంటాడని స్పష్టం చేశాడు. తనకు తెలిసినంత వరకు ఇదే నిజమని పేర్కొన్నాడు. కేన్ విలియమ్సన్ గురించి ఇలాంటి వార్తలను మొదటిసారిగా వింటున్నానని తెలిపాడు. సన్ రైజర్స్ ఓడిన మ్యాచ్ ల్లోనూ కేన్ విలియమ్సన్ అద్భుత ప్రతిభ చూపిన ఘట్టాలున్నాయి. విలియమ్సన్ ఇటీవల ముగిసిన ఐపీఎల్ సీజన్ లో 12 మ్యాచ్ లు ఆడి 45 సగటుతో 317 పరుగులు చేశాడు.