Rajasthan: పని చేయాల్సిన చోట నాగినీ డ్యాన్సులు... టీచర్లపై వేటు!

రాజస్థాన్ లోని కొందరు టీచర్లు తమ విధులను పక్కనబెట్టి నాగినీ డ్యాన్సులతో రెచ్చిపోయారు. జలోర్ జిల్లాలో ఉపాధ్యాయులకు ప్రత్యేక శిక్షణ తరగతుల్లో భాగంగా ఓ స్కూల్లో శిబిరం ఏర్పాటు చేశారు. ఈ ట్రైనింగ్ క్లాసులకు హాజరైన టీచర్లు బ్రేక్ సమయంలో తమలోని కళను బయటపెట్టారు! ఓ లేడీ టీచర్ నాగినీలా ఊగిపోతూ డ్యాన్స్ మొదలుపెట్టగా, ఆమెకు మరో ఉపాధ్యాయుడు జతకలిశాడు. అతడు పాములోడు మాదిరిగా బూర ఊదుతున్నట్టు నటించగా, ఆమె నాగకన్యలా యాక్ట్ చేసింది. ఈ విషయం ఉన్నతాధికారులకు తెలియడంతో ఆ లేడీ టీచర్ ను, ఆమెతో కలిసి పాము డ్యాన్స్ చేసిన మరో ఉపాధ్యాయుడ్ని సస్పెండ్ చేశారు. వారిని ఎంకరేజ్ చేసిన మరో ఇద్దరికి షోకాజ్ నోటీసులు జారీ చేశారు. ప్రస్తుతం దీనికి సంబంధించిన వీడియో సామాజిక మాధ్యమాల్లో వైరల్ అవుతోంది.