ఎన్టీఆర్ తో కచ్చితంగా సినిమా చేస్తా : అనిల్ రావిపూడి

వరుసగా సక్సెస్ లను అందిస్తూ ముందుకు దూసుకుపోతోన్న యువ దర్శకుల జాబితాలో అనిల్ రావిపూడి పేరు కూడా కనిపిస్తుంది. ఆయన తాజా చిత్రంగా 'రాజా ది గ్రేట్' సినిమా రేపు ప్రేక్షకుల ముందుకు రానుంది. ఈ నేపథ్యంలో ఈ సినిమా ప్రమోషన్స్ తో అనిల్ రావిపూడి ఫుల్ బిజీగా వున్నాడు. గతంలో ఎన్టీఆర్ తో అనిల్ ఒక సినిమా చేయనున్నట్టు వార్తలు వచ్చాయి.

 ఆ విషయాన్ని గురించి తాజాగా ఆయన స్పందిస్తూ .. తాను ఎన్టీఆర్ తో సినిమా చేయాలనుకున్న విషయం నిజమేనని చెప్పాడు. ఎన్టీఆర్ కోసం తాను రెడీ చేసిన కథను కొంతవరకూ వినిపించడం జరిగిందనీ, ఆ తరువాత కొన్ని కారణాల వలన మిగతా కథను వినిపించలేకపోయానని అన్నాడు. త్వరలోనే ఎన్టీఆర్ కి పూర్తి కథను వినిపిస్తానని చెప్పాడు. ఎన్టీఆర్ తో కచ్చితంగా సినిమా చేస్తాననీ .. తమ కాంబినేషన్లో తప్పకుండా సినిమా ఉంటుందని చెప్పుకొచ్చాడు.