: రాష్ట్రపతి అభ్యర్థి పేరు చెప్పడం లేదు.. వచ్చి మద్దతు ఇవ్వమని అడుగుతున్నారు!: సీతారాం ఏచూరి
రాష్ట్రపతి ఎన్నిక ద‌గ్గ‌ర ప‌డుతున్న నేప‌థ్యంలో భార‌తీయ జ‌న‌తా పార్టీ నేత‌లు తాము పోటీలో నిల‌బెట్ట‌నున్న అభ్య‌ర్థికి మద్దతు తెలపాలంటూ విప‌క్ష నేత‌ల‌తో భేటీ అవుతున్నారు. అయితే త‌మ అభ్యర్థి పేరును మాత్రం ఆ పార్టీ ర‌హ‌స్యంగానే ఉంచింది. ఇదే అంశంపై సీపీఎం ప్రధాన కార్యదర్శి సీతారాం ఏచూరిని కేంద్ర మంత్రులు వెంకయ్యనాయుడు, రాజ్‌నాథ్ సింగ్ లు క‌లిశారు.
ఈ సందర్భంగా ఏచూరి మీడియాతో మాట్లాడుతూ... రాష్ట్రపతి అభ్య‌ర్థిగా ఎన్డీఏ ఎవ‌రిని నిల‌బెడుతుందో ఏ పేరునూ వారు తనకు చెప్ప‌లేద‌ని అన్నారు. అభ్యర్థి పేరు చెప్ప‌కుండానే త‌మ మద్దతను కోరింద‌ని అన్నారు. మద్దతు ఇవ్వాలంటే అభ్యర్థి ఉండాలని, ఆ అభ్యర్థి రాజ్యాంగాన్ని పరిరక్షించ గలిగే వ్యక్తి అయి ఉండాలని అన్నారు. పేరు చెప్ప‌కుండానే మద్దతు ఎలా ఇస్తామ‌ని అన్నారు. నాలుగు రోజుల తర్వాత తాము అభ్యర్థి పేరును తెలిపి, మళ్లీ సంప్రదింపులు జరుపుతామని బీజేపీ నేత‌లు త‌న‌తో చెప్పినట్టు ఏచూరి తెలిపారు.
