: మనస్ఫూర్తిగా చెబుతున్నా, ఆంధ్రప్రదేశ్ వెలిగిపోతుంది: చంద్రబాబు

ఉజ్వల భవిష్యత్తు ఆంధ్రప్రదేశ్ రాష్ట్రం కోసం ఎదురుచూస్తోందని ముఖ్యమంత్రి చంద్రబాబునాయుడు వ్యాఖ్యానించారు. రాష్టం వెలిగిపోతుందని తాను మనస్ఫూర్తిగా చెప్పగలనని అన్నారు. ఈ ఉదయం రాజమండ్రి సమీపంలోని దివాన్ చెరువు రిజర్వ్ ఫారెస్టులో 'పుష్కర వనం'కు ఆయన శంకుస్థాపన చేశారు. 250 ఎకరాల్లో తలపెట్టిన పుష్కరవనం పైలాన్ ను ఆయన ఆవిష్కరించారు. ఈ సందర్భంగా ఆయన ప్రసంగిస్తూ, ప్రతి ఒక్కరూ చెట్లను పెంచేందుకు ప్రతిజ్ఞ చేయాలని కోరారు. ప్రకృతిలో భాగంగా ఉన్న ప్రజలు, ఆ ప్రకృతి పరిరక్షణకు నడుం బిగించాలని సూచించారు. వివిధ రకాల మొక్కలు, వాటి సంరక్షణా పద్ధతులు, పెంచే విధానంపై ప్రజల్లో అవగాహన పెంచేందుకు www.apforest.gov.in వెబ్ సైట్ లో ప్రత్యేక ఏర్పాట్లు చేశామని, మొక్కలకు సంబంధించిన సమాచారమంతా అందుబాటులో ఉంచామని వివరించారు.