CSK: ఐపీఎల్: జడేజా హాఫ్ సెంచరీ, ఆఖర్లో ధోనీ మెరుపులు
- ఐపీఎల్ లో ఇవాళ చెన్నై సూపర్ కింగ్స్ × లక్నో సూపర్ జెయింట్స్
- టాస్ గెలిచి బౌలింగ్ ఎంచుకున్న లక్నో జట్టు
- 20 ఓవర్లలో 6 వికెట్లకు 176 పరుగులు చేసిన చెన్నై
బ్యాటింగ్ కు అనుకూలించని పిచ్ పై లక్నో సూపర్ జెయింట్స్ తో మ్యాచ్ లో చెన్నై సూపర్ కింగ్స్ ఓ మోస్తరు స్కోరు సాధించింది. లక్నోలో జరుగుతున్న ఈ పోరులో టాస్ గెలిచిన సూపర్ జెయింట్స్ బౌలింగ్ ఎంచుకోగా... మొదట బ్యాటింగ్ చేపట్టిన చెన్నై సూపర్ కింగ్స్ నిర్ణీత 20 ఓవర్లలో 6 వికెట్లకు 176 పరుగులు చేసింది.
రవీంద్ర జడేజా హాఫ్ సెంచరీ సాధించడం, ఆఖర్లో ధోనీ మెరుపులు మెరిపించడం సీఎస్కే ఇన్నింగ్స్ లో హైలైట్ గా నిలిచాయి. జడేజా 40 బంతుల్లో 5 ఫోర్లు, 1 సిక్స్ తో 57 పరుగులు చేయగా... చివర్లో బ్యాటింగ్ కు దిగిన ధోనీ కేవలం 9 బంతుల్లో 3 ఫోర్లు, 2 సిక్సులతో 28 పరుగులతో అజేయంగా నిలిచాడు.
మొయిన్ అలీ 20 బంతుల్లో 3 సిక్సులతో 30 పరుగులు చేశాడు. అంతకుముందు, ఇన్నింగ్స్ ఆరంభంలో ఓపెనర్ రచిన్ రవీంద్ర (0) డకౌట్ కాగా, మరో ఓపెనర్ అజింక్యా రహానే 36 పరుగులు చేశాడు.
లక్నో సూపర్ జెయింట్స్ బౌలర్లలో కృనాల్ పాండ్యా 2, మొహిసిన్ ఖాన్ 1, యశ్ ఠాకూర్ 1, రవి బిష్ణోయ్ 1, మార్కస్ స్టొయినిస్ 1 వికెట్ తీశారు.
