కింద కూర్చుని ‘సింగీతం’పై గౌరవం చాటుకున్న నాగ్ అశ్విన్!
- 94 ఏళ్ల లెజెండరీ దర్శకుడు సింగీతం శ్రీనివాసరావు దర్శకత్వంలో ‘సింగ్ గీతం’
- చెన్నైలో జరిగిన ప్రీ-రిలీజ్ ఈవెంట్లో నాగ్ అశ్విన్ చూపిన వినమ్రతపై ప్రశంసలు
- కుర్చీలు వేసినా.. నాగ్ అశ్విన్ కింద కూర్చోవడమే కాకుండా కాళ్లకు నమస్కరించిన వైనం
- డైలాగులు లేకుండా కేవలం పాటల రూపంలోనే సాగే ఈ చిత్రం జూన్ 11న విడుదల
ఈ కార్యక్రమానికి విశ్వనటుడు కమల్ హాసన్, ప్రముఖ నిర్మాత అశ్వినీదత్ వంటి సీనియర్ ప్రముఖులు హాజరయ్యారు. వారందరికీ స్టేజ్పై కుర్చీలు వేసినప్పటికీ, నాగ్ అశ్విన్ మాత్రం పెద్దలపై ఉన్న గౌరవంతో నేలపైనే కూర్చున్నారు. అంతేకాకుండా, తను మాట్లాడటానికి మైక్ తీసుకునే ముందు స్టేజ్పై ఉన్న సింగీతం శ్రీనివాసరావు కాళ్లను తాకి ఆశీస్సులు తీసుకున్నారు. ఒక స్టార్ డైరెక్టర్ అయ్యుండి కూడా ఇంత వినమ్రతను ప్రదర్శించడం చూసి అక్కడికి వచ్చిన వారంతా ఫిదా అయ్యారు. దీనికి సంబంధించిన వీడియో నెటిజన్లను విపరీతంగా ఆకట్టుకుంటోంది.
ఒక అద్భుతమైన ప్రయోగం
ఈ సందర్భంగా నాగ్ అశ్విన్ సినిమా గురించి పలు ఆసక్తికర విషయాలు పంచుకున్నారు. "ఇది ప్రేక్షకులు ఒక వారంలో మర్చిపోయే సినిమా కాదు. రాబోయే పదేళ్ల వరకు గుర్తుంచుకునేలా ‘సింగీతం’ ఈ మ్యూజికల్ ఫాంటసీని తెరకెక్కించారు. ఈ సినిమాలో సాధారణ డైలాగులు ఉండవు, ప్రతి ఒక్క మాట పాటల రూపంలోనే సాగుతుంది. దేవిశ్రీ ప్రసాద్ అందించిన ఈ నిరంతర సంగీత ప్రయోగం ఇండియన్ సినిమాలో ముందెన్నడూ రాలేదు" అని నాగ్ అశ్విన్ చెప్పారు. ఈ ప్రాజెక్ట్ కోసం తాను కేవలం నిర్మాతగానే కాకుండా, సింగీతం వద్ద ఒక అసిస్టెంట్ డైరెక్టర్లా ఉండి పనిచేశానని గర్వంగా చెప్పుకొచ్చారు.
అయాన్, అహిల్యా బమ్రూ, శాలినీ కొండేపూడి వంటి నూతన నటీనటులతో రూపొందిన ఈ వినూత్న చిత్రంపై టాలీవుడ్తో పాటు కోలీవుడ్లోనూ భారీ అంచనాలు ఉన్నాయి. ఒక తరం సీనియర్ దర్శకుడి కలల ప్రాజెక్ట్ను, నేటి తరం మేటి దర్శకుడు నాగ్ అశ్విన్ దగ్గరుండి నడిపించిన తీరు చిత్ర పరిశ్రమలో ఒక మంచి సంప్రదాయానికి వేదికగా నిలిచింది.
