Harmanpreet Kaur: మర్దానీ 3 ట్రైలర్ పై స్పందించిన భారత మహిళల క్రికెట్ జట్టు కెప్టెన్ హర్మన్ ప్రీత్ కౌర్

బాలీవుడ్ నటి రాణీ ముఖర్జీ ప్రధాన పాత్రలో నటించిన క్రైమ్ డ్రామా 'మర్దానీ 3' ట్రైలర్‌పై భారత మహిళా క్రికెట్ జట్టు కెప్టెన్ హర్మన్‌ప్రీత్ కౌర్ స్పందించింది. మహిళలపై జరుగుతున్న నేరాలకు సత్వరమే, ఉదాహరణగా నిలిచే కఠిన శిక్షలు విధించాల్సిన అవసరం ఉందని ఆమె గట్టిగా అభిప్రాయపడింది. ట్రైలర్ చూసిన తర్వాత తన భావాలను సోషల్ మీడియా వేదికగా పంచుకుంది.

"మర్దానీ 3' ట్రైలర్ అద్భుతంగా (ఇన్సేన్‌గా) ఉంది. సినిమా కోసం వేచిచూడలేకపోతున్నాను" అని హర్మన్‌ప్రీత్ తన ఇన్‌స్టాగ్రామ్ పోస్ట్‌లో పేర్కొంది. ఇదే సందర్భంగా, భారతదేశంలోని బాలికలు, మహిళలను రక్షించడానికి నిరంతరం శ్రమిస్తున్న పోలీసు బలగాలకు ఆమె ధన్యవాదాలు తెలిపింది. "మనల్ని ప్రతీరోజూ కాపాడటానికి సిద్ధంగా ఉండే మన పోలీసు ఫోర్స్‌ను నేను ప్రేమిస్తున్నాను" అని ఆమె రాసుకొచ్చింది.

దేశవ్యాప్తంగా అట్టడుగు వర్గాలకు చెందిన 8-9 ఏళ్ల బాలికలను ఒక నిర్దిష్ట కారణంతో కిడ్నాప్ చేసే తీవ్రమైన సమస్యపై 'మర్దానీ 3' దృష్టి సారిస్తోంది. ఈ ఫ్రాంచైజీలో గతంలో వచ్చిన 'మర్దానీ' చిత్రం హ్యూమన్ ట్రాఫికింగ్ చీకటి కోణాలను ఆవిష్కరించగా, 'మర్దానీ 2' ఒక సీరియల్ రేపిస్ట్ వికృత మానసిక స్థితిని, వ్యవస్థను సవాలు చేసే తీరును చూపించి విమర్శకుల ప్రశంసలు అందుకుంది.

తాజాగా, ప్రేక్షకుల ముందుకు వస్తున్న 'మర్దానీ 3' ట్రైలర్‌పై హర్మన్‌ప్రీత్‌తో పాటు పలువురు సినీ ప్రముఖులు కూడా ప్రశంసల వర్షం కురిపించారు. రాణీ ముఖర్జీతో 'ముజ్‌సే దోస్తీ కరోగే'లో కలిసి నటించిన కరీనా కపూర్... ఆమెను 'డైనమైట్' అని అభివర్ణించారు. నటి కత్రినా కైఫ్... రాణీని 'క్వీన్' అంటూ కొనియాడారు. "రాణీ ముఖర్జీకి ప్రత్యామ్నాయం లేదు, ఆమెను ఆపలేరు" అని పోస్ట్ చేశారు. మరోవైపు, నటి కియారా అద్వానీ స్పందిస్తూ, "పరిశ్రమలో 30 ఏళ్లు పూర్తి చేసుకున్నప్పటికీ రాణీ తెరపై తన ఆధిపత్యాన్ని కొనసాగిస్తున్నారు" అని ప్రశంసించారు.

ఆదిత్య చోప్రా నిర్మించిన ఈ చిత్రానికి అభిరాజ్ మీనావాలా దర్శకత్వం వహించారు. ఎన్నో అంచనాల మధ్య 'మర్దానీ 3' ఈ నెల 30న ప్రేక్షకుల ముందుకు రానుంది.