Henil Patel: అండర్-19 వరల్డ్ కప్... బోణీ కొట్టిన టీమిండియా కుర్రాళ్లు

అండర్-19 ప్రపంచకప్‌లో ఐదుసార్లు ఛాంపియన్ అయిన భారత యువ జట్టు తన ప్రస్థానాన్ని విజయంతో ప్రారంభించింది. జింబాబ్వేలోని బులవాయోలో గురువారం జరిగిన తమ తొలి మ్యాచ్‌లో అమెరికాపై డక్‌వర్త్ లూయిస్ పద్ధతిలో 6 వికెట్ల తేడాతో ఘన విజయం సాధించింది. భారత పేసర్ హెనిల్ పటేల్ 5 వికెట్ల ప్రదర్శనతో అమెరికా బ్యాటింగ్‌ను కుప్పకూల్చాడు.

ఈ మ్యాచ్‌లో టాస్ గెలిచిన భారత్ ఫీల్డింగ్ ఎంచుకుంది. కెప్టెన్ నమ్మకాన్ని నిలబెడుతూ హెనిల్ పటేల్ తన తొలి స్పెల్‌లోనే అమెరికా టాపార్డర్‌ను దెబ్బతీశాడు. కేవలం 12 ఓవర్లలోనే 35 పరుగులకు 4 వికెట్లు కోల్పోయి యూఎస్‌ఏ పీకల్లోతు కష్టాల్లో పడింది. ఆ తర్వాత కూడా భారత బౌలర్లు క్రమం తప్పకుండా వికెట్లు తీయడంతో అమెరికా జట్టు 35.2 ఓవర్లలో 107 పరుగులకే ఆలౌట్ అయింది. హెనిల్ పటేల్ 16 పరుగులిచ్చి 5 వికెట్లు పడగొట్టి ఈ టోర్నీలో తొలి ఐదు వికెట్ల ప్రదర్శన నమోదు చేసిన బౌలర్‌గా నిలిచాడు.

అనంతరం బ్యాటింగ్ ప్రారంభించిన భారత్‌కు ఆదిలోనే ఎదురుదెబ్బ తగిలింది. ఈ మ్యాచ్ ద్వారా 14 ఏళ్ల 294 రోజులకే అరంగేట్రం చేసి, U19 ప్రపంచకప్‌లో ఆడిన అత్యంత పిన్న వయస్కుడిగా ప్రపంచ రికార్డు సృష్టించిన వైభవ్ సూర్యవంశీ త్వరగా ఔటయ్యాడు. కాసేపటికే వర్షం, మెరుపుల కారణంగా ఆటకు అంతరాయం కలిగింది. దీంతో భారత లక్ష్యాన్ని 37 ఓవర్లలో 96 పరుగులుగా నిర్ధారించారు. వర్షం తర్వాత ఆట మొదలవగా, భారత్ 25 పరుగులకే 3 వికెట్లు కోల్పోయి కష్టాల్లో పడింది. ఈ దశలో అభిగ్యాన్ కుందు (42 నాటౌట్), విహాన్ మల్హోత్రా కీలక భాగస్వామ్యం నెలకొల్పి జట్టును విజయ తీరాలకు చేర్చారు.

భారత్ తన తర్వాతి మ్యాచ్‌లో శనివారం బంగ్లాదేశ్‌తో తలపడనుంది.