Vijay: విజయ్ చివరి సినిమా ‘జన నాయకుడు’ ట్రైలర్ వచ్చేసింది!

కోలీవుడ్ స్టార్ హీరో దళపతి విజయ్ నటిస్తున్న చివరి చిత్రం ‘జన నాయకుడు’ ట్రైలర్ విడుదలైంది. హెచ్. వినోద్ దర్శకత్వం వహించిన ఈ పొలిటికల్ యాక్షన్ థ్రిల్లర్ ట్రైలర్ శనివారం విడుదలై సోషల్ మీడియాలో సందడి చేస్తోంది. పూర్తిస్థాయి రాజకీయాల్లోకి ప్రవేశిస్తున్న విజయ్, ఈ సినిమాతో నటనకు వీడ్కోలు పలుకుతున్న నేపథ్యంలో దీనిపై భారీ అంచనాలు నెలకొన్నాయి.

ట్రైలర్‌లో విజయ్ తనదైన స్టైలిష్ ఎంట్రీ, హై వోల్టేజ్ యాక్షన్ సన్నివేశాలతో ఆకట్టుకున్నారు. పవర్‌ఫుల్ డైలాగులు, భావోద్వేగ సన్నివేశాలు సినిమాపై ఆసక్తిని పెంచుతున్నాయి. ముఖ్యంగా జైలు నుంచి బయటకు వచ్చి శత్రువులను ఎదుర్కొనే దృశ్యాలు ప్రేక్షకులను ఆకట్టుకునేలా ఉన్నాయి. ఈ చిత్రంలో విజయ్ సరసన పూజా హెగ్డే హీరోయిన్‌గా నటిస్తుండగా, ఆయన కూతురి పాత్రలో మమితా బైజు కనిపించనుంది. బాలీవుడ్ నటుడు బాబీ డియోల్ ప్రతినాయకుడిగా నటిస్తున్నారు.

కేవీఎన్ ప్రొడక్షన్స్ నిర్మిస్తున్న ఈ చిత్రానికి అనిరుధ్ రవిచందర్ సంగీతం అందిస్తున్నారు. ప్రకాశ్ రాజ్, ప్రియమణి, గౌతమ్ వాసుదేవ్ మీనన్ కీలక పాత్రల్లో నటిస్తున్నారు.

సంక్రాంతి కానుకగా జనవరి 9న ఈ చిత్రం తమిళ, తెలుగు, హిందీ భాషల్లో గ్రాండ్‌గా విడుదల కానుంది. ట్రైలర్ విడుదలతో సినిమాపై అంచనాలు రెట్టింపయ్యాయి.