బీహార్ రాజకీయాల్లో కొత్త సమీకరణాలు.. నితీశ్కు ఒవైసీ మద్దతు!
- నితీశ్ కుమార్ ప్రభుత్వానికి మద్దతిచ్చేందుకు సిద్ధమన్న అసదుద్దీన్ ఒవైసీ
- సీమాంచల్ ప్రాంతానికి న్యాయం చేయాలన్నదే మా షరతు అని వెల్లడి
- తమ ఐదుగురు ఎమ్మెల్యేలు వారానికి రెండు రోజులు ఆఫీసులో ఉండాల్సిందేనని ఆదేశం
- ఆర్జేడీ 'ఎంవై' సమీకరణం బీజేపీని ఆపలేకపోయిందని విమర్శ
"అభివృద్ధి కేవలం పాట్నా, రాజ్గిర్కే పరిమితం కాకూడదు. సీమాంచల్ ప్రాంతం నదుల కోత, భారీ ఎత్తున వలసలు, విపరీతమైన అవినీతితో తీవ్రంగా నష్టపోతోంది. ప్రభుత్వం ఈ సమస్యలను పరిష్కరించాలి. సీమాంచల్కు న్యాయం జరిగితే నితీశ్ కుమార్ ప్రభుత్వానికి మద్దతు ఇవ్వడానికి మేం సిద్ధంగా ఉన్నాం" అని ఒవైసీ అన్నారు.
బీహార్ ఈశాన్య ప్రాంతంలో ఉన్న సీమాంచల్లో ముస్లిం జనాభా అధికం. రాష్ట్రంలో అత్యంత వెనుకబడిన ప్రాంతాల్లో ఇది కూడా ఒకటి. ఈ ప్రాంతంలోని 24 నియోజకవర్గాల్లో ఎన్డీయే 14 స్థానాలు గెలుచుకోగా, ఒవైసీకి చెందిన ఎంఐఎం తన పట్టు నిలుపుకుని 2020లో మాదిరిగానే ఐదు సీట్లు కైవసం చేసుకుంది.
ఈ సందర్భంగా, తమ పార్టీ ఎమ్మెల్యేలు ప్రజలకు అందుబాటులో ఉండేలా కఠిన నిబంధనలు పెడుతున్నట్లు ఒవైసీ తెలిపారు. "మా ఐదుగురు ఎమ్మెల్యేలు వారానికి రెండుసార్లు తమ నియోజకవర్గ కార్యాలయాల్లో కూర్చుని వాట్సాప్ లైవ్ లొకేషన్తో ఉన్న ఫొటోలను నాకు పంపాలి. వారు కచ్చితంగా ఎక్కడున్నారో నేను తెలుసుకుంటాను" అని ఆయన వివరించారు. ఆరు నెలల్లో ఈ విధానాన్ని ప్రారంభిస్తామని, తాను కూడా ఆరు నెలలకు ఒకసారి పర్యటిస్తానని చెప్పారు.
అలాగే, ఎన్నికల ఫలితాల అనంతరం ప్రతిపక్షాల వైఫల్యంపై కూడా ఆయన స్పందించారు. ఆర్జేడీ 'ఎంవై' (ముస్లిం-యాదవ్) సమీకరణం బీజేపీని అడ్డుకోలేదని తాను మొదటి నుంచి చెబుతున్నానని గుర్తుచేశారు.
