తలాక్-ఎ-హసన్పై సుప్రీంకోర్టు సీరియస్.. ఆధునిక సమాజంలో ఇదెలా సాధ్యమని ప్రశ్న
- తలాక్-ఎ-హసన్ చెల్లుబాటును ప్రశ్నించిన సుప్రీంకోర్టు
- ఆధునిక సమాజంలో ఇలాంటి పద్ధతులకు చోటెక్కడని వ్యాఖ్య
- లాయర్ ద్వారా విడాకులు ఇవ్వడంపై తీవ్ర అభ్యంతరం
- భర్తను కోర్టుకు హాజరు కావాలని ఆదేశించిన ధర్మాసనం
ఓ ముస్లిం మహిళ దాఖలు చేసిన పిటిషన్పై విచారణ సందర్భంగా కోర్టు ఈ వ్యాఖ్యలు చేసింది. బెనజీర్ హీనా అనే మహిళకు ఆమె భర్త గులాం అక్తర్ తన న్యాయవాది ద్వారా విడాకుల నోటీసు పంపించాడు. ఆ తర్వాత అతను మరో వివాహం చేసుకున్నాడు. అయితే, 11 పేజీల తలాక్ నోటీసుపై భర్త సంతకం లేకపోవడంతో తన బిడ్డకు స్కూల్లో అడ్మిషన్ ఇప్పించడానికి ఇబ్బందులు పడుతున్నానని ఆమె కోర్టుకు తెలిపారు.
దీనిపై ధర్మాసనం తీవ్రంగా స్పందించింది. ఇస్లాంలో ఇది సాధారణ పద్ధతేనని భర్త తరఫు న్యాయవాది వాదించగా.. "ఇదొక పద్ధతి ఎలా అవుతుంది? ఇలాంటి కొత్త కొత్త ఆలోచనలు ఎలా పుట్టుకొస్తున్నాయి?" అని కోర్టు ప్రశ్నించింది. "విడాకుల విషయంలో భార్యతో నేరుగా మాట్లాడటానికి భర్తకు ఉన్న అహంకారం ఏంటి? ఇది ఒక మహిళ ఆత్మగౌరవానికి సంబంధించిన విషయం. ఆధునిక సమాజంలో ఇలాంటి వాటిని ఎలా ప్రోత్సహిస్తారు?" అని ఘాటుగా వ్యాఖ్యానించింది. మతపరమైన పద్ధతుల ప్రకారం విడాకులు తీసుకోవాలనుకుంటే, నిర్దేశించిన పూర్తి విధానాన్ని పాటించాల్సిందేనని స్పష్టం చేసింది.
తన హక్కుల కోసం పోరాడుతున్న పిటిషనర్ను అభినందించిన ధర్మాసనం, వనరులు లేని పేద మహిళల పరిస్థితి ఏంటని ఆందోళన వ్యక్తం చేసింది. తదుపరి విచారణకు భర్తను కోర్టుకు హాజరు కావాలని, ఆమెకు కావాల్సినవి బేషరతుగా అందించాలని ఆదేశించింది.
