అశ్విన్ వర్సెస్ హర్భజన్.. పిచ్ పై భిన్నాభిప్రాయాలు

భారత్, దక్షిణాఫ్రికా మధ్య కోల్‌కతాలోని ఈడెన్ గార్డెన్స్‌లో జరుగుతున్న తొలి టెస్టులో పిచ్ తీవ్ర వివాదానికి దారితీసింది. రెండో రోజైన శనివారం ఏకంగా 15 వికెట్లు పడటంతో పిచ్ నాణ్యతపై సర్వత్రా చర్చ మొదలైంది. స్పిన్నర్ రవీంద్ర జడేజా (4/27) ధాటికి దక్షిణాఫ్రికా బ్యాటింగ్ ఆర్డర్ కుప్పకూలింది. దీంతో రెండో రోజు ఆట ముగిసే సమయానికి సఫారీ జట్టు 7 వికెట్ల నష్టానికి 93 పరుగులు చేసి, కేవలం 63 పరుగుల ఆధిక్యంలో నిలిచి ఓటమి అంచున నిలిచింది.

ఈ పిచ్‌పై మాజీ క్రికెటర్ల మధ్య భిన్నాభిప్రాయాలు వ్యక్తమవుతున్నాయి. ఆస్ట్రేలియా మాజీ కెప్టెన్ ఆరోన్ ఫించ్, ఈ పిచ్‌పై మీ అభిప్రాయం ఏంటని అశ్విన్‌ను ప్రశ్నించగా.. అశ్విన్ స్పందిస్తూ బ్యాటర్ల టెక్నిక్‌ను తప్పుబట్టారు. "ఈ పిచ్ ఆడదగినదేనని దక్షిణాఫ్రికా కెప్టెన్ బవుమా తన డిఫెన్స్‌తో నిరూపించాడు. సరైన టెక్నిక్‌తో ఆడకపోతే ఇలాంటి వికెట్లపై పరుగులు చేయడం కష్టం" అని బదులిచ్చారు.

అయితే, టీమిండియా మాజీ స్పిన్నర్ హర్భజన్ సింగ్ మాత్రం తీవ్రంగా స్పందించారు. "టెస్ట్ క్రికెట్‌ను అపహాస్యం చేస్తున్నారు. రెండో రోజే ఆట ముగిసే దశకు వచ్చింది. టెస్ట్ క్రికెట్‌కు ఇది అంతిమయాత్ర లాంటిది" అని ఎక్స్‌లో ఘాటుగా విమర్శించారు. మాజీ కోచ్ రవిశాస్త్రి దీన్ని 'సాధారణ' పిచ్ అని పేర్కొనగా, ఇంగ్లండ్ మాజీ కెప్టెన్ మైఖేల్ వాన్ 'అధ్వాన్నం' అని అభివర్ణించారు.

మొదటి రోజు కాస్త పొడిగా కనిపించిన పిచ్, రెండో రోజు ఉదయానికే నాలుగో రోజు వికెట్‌లా మారిపోయింది. బంతి అనూహ్యంగా బౌన్స్ అవ్వడం, దుమ్ము లేవడంతో బ్యాటర్లు తీవ్రంగా ఇబ్బంది పడ్డారు. ఈడెన్ గార్డెన్స్ క్యూరేటర్ సుజన్ ముఖర్జీ సొంతంగా ఇలాంటి పిచ్ తయారు చేశారా లేక జట్టు యాజమాన్యం నుంచి ఏమైనా ఒత్తిడి వచ్చిందా అనే దానిపై స్పష్టత లేదు.