Inspection Bungalow: ఓటీటీలో మలయాళం హారర్ థ్రిల్లర్ సిరీస్!

ఒకప్పుడు హారర్ కంటెంట్ తో కూడిన సినిమాలు థియేటర్లకు వస్తే, జనాలు పెద్దగా చూసేవారు కాదు. ఎందుకంటే ఈ తరహా కథలను ఇష్టపడే ఒక వర్గం ప్రేక్షకులు మాత్రమే వచ్చేవారు.  కానీ అదే హారర్ కంటెంట్ కి ఇప్పుడు ఓటీటీ ట్రాక్ పై విపరీతమైన క్రేజ్ ఉంది. అందువలన శుక్రవారం వచ్చేసరికి ఈ తరహా జోనర్ కి సంబంధించిన సినిమాలు .. సిరీస్ లు క్యూ కడుతున్నాయి. వీటిలో ముందుగా ఏవి చూడాలనే కుతూహలంతో ప్రేక్షకులు ఉంటున్నారు. 

ఈ నేపథ్యంలో ఓటీటీ ప్రేక్షకుల ముందుకు రావడానికి ఒక మలయాళ హారర్ కామెడీ థ్రిల్లర్ సిద్ధమవుతోంది. ఆ సిరీస్ పేరే 'ఇన్స్పెక్షన్ బంగ్లా'. సైజు దర్శకత్వం వహించిన ఈ సిరీస్ లోశబరీశ్ వర్మ .. షాజు శ్రీధర్ .. జయన్ .. వీణా నాయర్ .. బాలాజీ శర్మ .. సెంథిల్ కృష్ణ ప్రధానమైన పాత్రలను పోషించారు. 'జీ 5'లో ఈ నెల 14వ తేదీ నుంచి మళయాళంతో పాటు తమిళ .. తెలుగు భాషల్లో ఈ సిరీస్ ను స్ట్రీమింగ్ చేయనున్నారు. 

కథలోకి వెళితే .. ఒక గ్రామంలోని పోలీస్ స్టేషన్ కి సబ్ ఇన్ స్పెక్టర్ విష్ణుకి బదిలీ అవుతుంది. ఆ గ్రామానికి వచ్చిన అతను, పోలీస్ స్టేషన్ ను ఒక పాడుబడిన బంగళాలోకి మార్చవలసి వస్తుంది. అది ప్రభుత్వానికి సంబంధించిన బంగ్లా. అలా పోలీస్ స్టేషన్ ను ఆ బంగ్లాలోకి మార్చే ప్రయత్నంలో అతనికి ఎలాంటి పరిస్థితులు ఎదురవుతాయి?అందుకు కారణం ఏమిటి? పాడుబడిన ఆ బంగ్లా నేపథ్యం ఏమిటి? అనేది కథ.