రామ్ చరణ్ 'చికిరి చికిరి' సాంగ్ ఆల్ టైమ్ రికార్డ్... యూట్యూబ్ లో ప్రభంజనం

గ్లోబల్ స్టార్ రామ్ చరణ్ నటిస్తున్న తాజా చిత్రం 'పెద్ది' నుంచి విడుదలైన తొలి పాట భారత సినీ చరిత్రలోనే సరికొత్త రికార్డు సృష్టించింది. 'చికిరి చికిరి' అంటూ సాగే ఈ పాట, ఇండియన్ సినిమాలో అత్యధిక వ్యూస్ సాధించిన పాటగా నిలిచి సంచలనం రేపింది. అత్యంత వేగంగా 32 మిలియన్ల వ్యూస్ సంపాదించింది. అన్ని భాషల్లో కలిపి 46 మిలియన్ల వ్యూస్ తో దూసుకుపోతోంది. ఈ విషయాన్ని చిత్ర బృందం అధికారికంగా ప్రకటించడంతో మెగా అభిమానులు సంబరాలు చేసుకుంటున్నారు.

'ఉప్పెన' ఫేమ్ బుచ్చిబాబు సానా దర్శకత్వంలో రూపుదిద్దుకుంటున్న ఈ సినిమాపై మొదటి నుంచి భారీ అంచనాలున్నాయి. దానికి తోడు సంగీత దిగ్గజం ఏఆర్ రెహమాన్ స్వరాలు సమకూర్చడంతో సినిమా స్థాయి మరింత పెరిగింది. రామ్ చరణ్, బుచ్చిబాబు, రెహమాన్ కలయికలో వచ్చిన ఈ మొదటి పాటకే అద్భుతమైన స్పందన లభించడం విశేషం. పాటలోని విజువల్స్, రామ్ చరణ్ డ్యాన్సింగ్ ఎనర్జీ ప్రేక్షకులను విశేషంగా ఆకట్టుకుంటున్నాయి.

మైత్రీ మూవీ మేకర్స్, వృద్ధి సినిమాస్, సుకుమార్ రైటింగ్స్ పతాకాలపై వెంకట సతీష్ కిలారు ఈ చిత్రాన్ని నిర్మిస్తున్నారు. రామ్ చరణ్ సరసన బాలీవుడ్ బ్యూటీ జాన్వీ కపూర్ హీరోయిన్‌గా నటిస్తుండగా, కన్నడ సూపర్ స్టార్ శివ రాజ్‌కుమార్, జగపతి బాబు, దివ్యేందు కీలక పాత్రల్లో కనిపించనున్నారు. రత్నవేలు సినిమాటోగ్రఫీ అందిస్తున్నారు.

ప్రస్తుతం 'చికిరి చికిరి' పాట యూట్యూబ్‌తో పాటు అన్ని మ్యూజిక్ ప్లాట్‌ఫామ్స్‌లో ట్రెండింగ్‌లో ఉంది. ఈ పాట సృష్టించిన ప్రభంజనంతో సినిమాపై అంచనాలు తారాస్థాయికి చేరాయి. 'పెద్ది' చిత్రాన్ని 2026 మార్చి 27న ప్రపంచవ్యాప్తంగా విడుదల చేయనున్నట్లు నిర్మాతలు ఇప్పటికే ప్రకటించారు.