భానుప్రియ ఫ్యామిలీ నేపథ్యం ఇదేనట!

భానుప్రియ .. విశాలమైన నేత్రాలతో తెలుగు తెరపై విన్యాసాలు చేసిన నాయిక. అందం .. అభినయానికి తోడు నాట్యంలో ఆమెకి గల ప్రవేశం మరింత ప్రత్యేకతను తెచ్చిపెట్టింది. ఒకానొక సమయంలో విజయశాంతి - రాధలతో పోటీపడుతూ, చిరంజీవి .. బాలకృష్ణ .. వెంకటేశ్ .. నాగార్జునలతో కలిసి నటించారు. కథానాయికగా ఒక వెలుగు వెలిగిన ఆమె, ఆ తరువాత కేరక్టర్ ఆర్టిస్టుగాను చేశారు. అలాంటి భానుప్రియ గురించి దర్శకుడు నందం హరిశ్చంద్రరావు, 'ట్రీ మీడియా'కి ఇచ్చిన ఇంటర్వ్యూలో ప్రస్తావించారు. 

"భానుప్రియ అసలు పేరు మంగభాను. ఆమెకి శాంతి అనే చెల్లెలు .. గోపాలకృష్ణ అనే అన్నయ్య ఉన్నారు. భానుప్రియ తండ్రి ఒక చిన్న టైలర్ .. తల్లి అతనికి సాయపడుతూ ఉండేది. ఆ తరువాత ఆయన మద్రాస్ కి మకాం మార్చి, సినిమా కంపెనీలలో టైలర్ గా పనిచేయడం మొదలుపెట్టాడు. భానుని హీరోయిన్ ను చేయాలనేది తల్లి ఆలోచన. అందువలన నాట్యం నేర్పిస్తూ, ఆ దిశగా ఆమె ప్రయత్నాలు చేయడం మొదలుపెట్టారు. అలా తమిళ సినిమాతో భానుప్రియ ఎంట్రీ ఇచ్చారు.  

తెలుగులో 'సితార'.. 'అన్వేషణ' .. 'ప్రేమించు పెళ్లాడు' ఆమెకి మంచి పేరు తెచ్చిపెట్టాయి. ఈ సమయంలోనే భానుప్రియను వంశీ పెళ్లి చేసుకోవాలని అనుకున్నాడు .. కానీ అందుకు భానుప్రియ తల్లి ఒప్పుకోలేదు. వంశీకి అప్పటికే పెళ్లి అయిన కారణంగా, ఆ విషయం పట్లనే ఆమె అభ్యంతరాన్ని వ్యక్తం చేశారు. కాస్త అమాయకురాలైన భానుప్రియ, ఆ ఆలోచనను విరమించుకున్నారు. ఆ తరువాత 'స్వర్ణకమలం' సినిమాతో భానుప్రియ రేంజ్ మారిపోయింది. ఆ తరువాత వరుస హిట్స్ తో దూసుకుపోయారు" అని చెప్పారు.