Gopireddy Srinivasa Reddy: వైసీపీ మాజీ ఎమ్మెల్యే గోపిరెడ్డిపై కేసు నమోదు

పల్నాడు జిల్లా నరసరావుపేట మాజీ ఎమ్మెల్యే, వైసీపీ నేత గోపిరెడ్డి శ్రీనివాసరెడ్డిపై పోలీసులు కేసు నమోదు చేశారు. రెండు రోజుల క్రితం పట్టణంలో ముందస్తు అనుమతి లేకుండా ర్యాలీ నిర్వహించారనే ఆరోపణలతో ఆయనతో పాటు మరో 22 మంది అనుచరులపై నరసరావుపేట వన్ టౌన్ పోలీస్‌స్టేషన్‌లో కేసు ఫైల్ చేశారు.

వివరాల్లోకి వెళితే, రాష్ట్రవ్యాప్తంగా నకిలీ మద్యం విక్రయాలు పెరిగిపోయాయని ఆరోపిస్తూ మంగళవారం గోపిరెడ్డి శ్రీనివాసరెడ్డి ఆధ్వర్యంలో వైసీపీ శ్రేణులు నిరసన చేపట్టాయి. ఈ సందర్భంగా వైసీపీ కార్యాలయం నుంచి ఎక్సైజ్ కార్యాలయం వరకు భారీ ర్యాలీ నిర్వహించారు. పట్టణంలో పోలీస్ యాక్ట్ 30 అమలులో ఉన్నప్పటికీ, నిబంధనలను ఉల్లంఘించి ర్యాలీ నిర్వహించినందుకు గాను పోలీసులు ఈ చర్యలు తీసుకున్నట్లు తెలుస్తోంది.

ఈ నిరసన కార్యక్రమంలో భాగంగా, నకిలీ మద్యం బాటిళ్లను రోడ్డుపై పగలగొట్టి వైసీపీ నేతలు తమ ఆగ్రహాన్ని వ్యక్తం చేశారు. అనంతరం ఎక్సైజ్ కార్యాలయానికి చేరుకొని సీఐకి వినతిపత్రం అందజేశారు. చంద్రబాబు నాయుడు ప్రభుత్వం బెల్ట్ షాపుల ద్వారా నకిలీ మద్యాన్ని డోర్ డెలివరీ చేయిస్తోందని ఈ సందర్భంగా గోపిరెడ్డి తీవ్ర విమర్శలు చేశారు. ఈ ఘటన జరిగిన రెండు రోజుల తర్వాత, అనుమతి లేని ర్యాలీపై పోలీసులు కేసు నమోదు చేయడం స్థానికంగా చర్చనీయాంశమైంది.