Viral Video: మరాఠా ఫుడ్ తిన్న బ్రిటిష్ యువతి.. మిర్చి దెబ్బకు షాకింగ్ రియాక్షన్!

సోషల్ మీడియా అందుబాటులోకి వచ్చాక ప్రపంచం ఓ కుగ్రామంగా మారిపోయింది. ఎక్కడో విదేశాల్లో ఉండే వారు మన సంస్కృతి, ఆహారపు అలవాట్లను ప్రయత్నిస్తూ అందరి దృష్టిని ఆకర్షిస్తున్నారు. తాజాగా డీనా అనే ఓ బ్రిటిష్ వ్లాగర్ మహారాష్ట్రకు చెందిన ఓ సంప్రదాయ వంటకాన్ని రుచి చూస్తున్న వీడియో ఇప్పుడు ఇంటర్నెట్ లో తెగ చక్కర్లు కొడుతోంది. అందులో ఆమె ఇచ్చిన రియాక్షన్, పడిన చిన్నపాటి ఇబ్బంది నెటిజన్లను విపరీతంగా ఆకట్టుకుంటోంది.

వివరాల్లోకి వెళితే... భారత్ లో పర్యటిస్తున్న డీనా (@sociallywanderful) ఇటీవల మహారాష్ట్రకు చెందిన 'పిత్లా-భాక్రీ' అనే వంటకాన్ని ప్రయత్నించింది. శనగపిండితో చేసే ఈ కూరను జొన్న రొట్టెతో కలిపి తింటారు. ఈ వంటకాన్ని కుడిచేత్తో తింటున్న సమయంలో, కూరలో ఉన్న పచ్చిమిర్చిని పొరపాటున బఠానీ అనుకుని తినేసింది. ఒక్కసారిగా కారం తగలడంతో ఆమె కాస్త ఇబ్బంది పడింది. ఆ తర్వాత నవ్వుతూ, "ఇది చాలా కారంగా ఉంది. కానీ నేను ఏడవట్లేదు. నేను ప్రపంచంలో ఎదుగుతున్నాను" అంటూ సరదాగా వ్యాఖ్యానించింది.

ఈ వీడియోతో పాటు తన అనుభవాన్ని వివరిస్తూ ఓ క్యాప్షన్ కూడా పెట్టింది. "నిజాయతీగా చెప్పాలంటే... మొదటి ముద్ద బాగుందనిపించింది. కానీ తినేకొద్దీ నాకు అంతగా నచ్చలేదు. ఇది నా టేస్ట్ కు తగ్గ వంటకం కాదు" అని డీనా స్పష్టం చేసింది. అయితే, అదే థాలీలో వడ్డించిన 'ఖేడ్కా భాజీ' (ఉల్లిపాయలతో చేసే ఓ రకమైన పకోడీ) మాత్రం అద్భుతంగా ఉందని ప్రశంసించింది. సింహగడ్ కోటను సందర్శించే వారు తప్పకుండా ఈ వంటకాన్ని ప్రయత్నించాలని, ఇది అక్కడి స్థానిక ప్రత్యేకత అని ఆమె సూచించింది.

ఈ వీడియో చూసిన నెటిజన్లు ఆమె నిజాయతీని మెచ్చుకుంటున్నారు. స్థానిక వంటకాలను ప్రయత్నించాలనే ఆమె ఆసక్తిని ప్రశంసిస్తూ కామెంట్లు పెడుతున్నారు. "మీరు అసలైన మహారాష్ట్ర భోజనం చేస్తున్నారు" అని ఒకరు అనగా, "కారం ఎక్కువగా అనిపిస్తే పెరుగుతో కలిపి తినండి" అని మరొకరు సలహా ఇచ్చారు. అంతకుముందు కేరళలో మసాలా సోడాను ప్రయత్నించి డీనా చేసిన వీడియో కూడా సోషల్ మీడియాలో వైరల్ అయిన సంగతి తెలిసిందే.