Neonatal Diabetes: నవజాత శిశువుల్లో కొత్త రకం మధుమేహం గుర్తింపు.. మెదడుపైనా తీవ్ర ప్రభావం!

వైద్య శాస్త్రంలో ఒక కీలక ముందడుగు పడింది. పుట్టిన ఆరు నెలల లోపు పసికందులపై ప్రభావం చూపే ఒక కొత్త రకం డయాబెటిస్‌ను అంతర్జాతీయ శాస్త్రవేత్తల బృందం కనుగొంది. ఇది కేవలం మధుమేహానికే పరిమితం కాకుండా, చిన్నారుల మెదడుపైనా తీవ్ర ప్రభావం చూపుతుందని వారి పరిశోధనలో తేలింది. ఈ అరుదైన వ్యాధికి ఒక నిర్దిష్ట జన్యుపరమైన లోపమే కారణమని వారు గుర్తించారు.

సాధారణంగా నవజాత శిశువుల్లో వచ్చే డయాబెటిస్‌ కేసుల్లో 85 శాతానికి పైగా జన్యుపరమైన కారణాలే ఉంటాయి. ఈ క్రమంలో, బ్రిటన్‌లోని యూనివర్సిటీ ఆఫ్ ఎక్సెటర్, బెల్జియంలోని యూనివర్సిటీ లిబ్రే డి బ్రక్సెల్స్ శాస్త్రవేత్తలు సంయుక్తంగా పరిశోధనలు చేపట్టారు. డయాబెటిస్‌తో పాటు మూర్ఛ (ఎపిలెప్సీ), తల పరిమాణం చిన్నగా ఉండటం (మైక్రోసెఫాలీ) వంటి నాడీ సంబంధిత సమస్యలతో బాధపడుతున్న ఆరుగురు చిన్నారులపై వీరు అధ్యయనం చేశారు. అత్యాధునిక డీఎన్ఏ సీక్వెన్సింగ్ టెక్నాలజీ ద్వారా వీరిలో 'టీఎమ్ఈఎమ్167ఏ'అనే జన్యువులో లోపాలు ఉన్నట్లు గుర్తించారు.

ఈ జన్యువు పనితీరును లోతుగా అర్థం చేసుకునేందుకు పరిశోధకులు స్టెమ్ సెల్స్ (మూల కణాలు), క్రిస్పర్  జీన్-ఎడిటింగ్ టెక్నాలజీని ఉపయోగించారు. 'టీఎమ్ఈఎమ్167ఏ' జన్యువు దెబ్బతిన్నప్పుడు, శరీరంలో ఇన్సులిన్‌ను ఉత్పత్తి చేసే ప్యాంక్రియాస్‌లోని బీటా కణాలు సరిగా పనిచేయలేవని కనుగొన్నారు. ఈ లోపం వల్ల ఆ కణాలు ఒత్తిడికి గురై చివరికి నాశనమవుతాయని తేలింది. కేవలం ఇన్సులిన్ కణాలకే కాకుండా, నాడీ కణాల (న్యూరాన్లు) పనితీరుకు కూడా ఈ జన్యువు చాలా అవసరమని వారి అధ్యయనంలో స్పష్టమైంది.

"ఈ ఆవిష్కరణ ఇన్సులిన్ ఉత్పత్తి ప్రక్రియను అర్థం చేసుకోవడంలో ఎంతగానో సహాయపడుతుంది. అరుదైన డయాబెటిస్‌పై చేసే పరిశోధనలు, భవిష్యత్తులో లక్షలాది మందిని వేధిస్తున్న ఇతర రకాల మధుమేహంపై కూడా కొత్త వెలుగు చూపగలవు" అని పరిశోధకులు ఆశాభావం వ్యక్తం చేశారు. ఈ పరిశోధన వివరాలు ప్రఖ్యాత 'జర్నల్ ఆఫ్ క్లినికల్ ఇన్వెస్టిగేషన్'లో ప్రచురితమయ్యాయి.