Tilak Varma: లంకపై భారత బ్యాటర్ల జోరు.. అభిషేక్, తిలక్ వర్మ అదుర్స్

ఆసియా కప్ 2025లో భాగంగా శ్రీలంకతో జరిగిన నామమాత్రపు సూపర్ 4 మ్యాచ్ లో భారత యువ బ్యాటర్లు అదరగొట్టారు. ఓపెనర్ అభిషేక్ శర్మ (61) వరుసగా మూడో హాఫ్ సెంచరీతో చెలరేగగా, మిడిలార్డర్ లో సంజూ శాంసన్ (39), తిలక్ వర్మ (49*) మెరుపులు మెరిపించారు. దీంతో శుక్రవారం దుబాయ్ అంతర్జాతీయ స్టేడియం వేదికగా జరిగిన ఈ మ్యాచ్ లో టీమిండియా నిర్ణీత 20 ఓవర్లలో 5 వికెట్ల నష్టానికి 202 పరుగుల భారీ స్కోరు నమోదు చేసింది.

టాస్ ఓడి మొదట బ్యాటింగ్ కు దిగిన భారత్ కు ఆరంభంలోనే ఎదురుదెబ్బ తగిలింది. ఓపెనర్ శుభ్ మన్ గిల్ తక్కువ స్కోరుకే పెవిలియన్ చేరాడు. ఆ తర్వాత క్రీజులోకి వచ్చిన కెప్టెన్ సూర్యకుమార్ యాదవ్ (12) కూడా మరోసారి నిరాశపరిచాడు. అయితే, మరో ఎండ్ లో ఉన్న అభిషేక్ శర్మ మాత్రం తన అద్భుతమైన ఫామ్ ను కొనసాగించాడు. లంక బౌలర్లపై ఎదురుదాడికి దిగి కేవలం 31 బంతుల్లో 8 ఫోర్లు, 2 సిక్సర్లతో 61 పరుగులు చేశాడు. భారీ షాట్ కు ప్రయత్నించి అతను ఔటయ్యాక, ఇన్నింగ్స్ ను చక్కదిద్దే బాధ్యతను సంజూ శాంసన్, తిలక్ వర్మ తీసుకున్నారు.

ముఖ్యంగా శాంసన్ తనదైన శైలిలో దూకుడుగా ఆడి 23 బంతుల్లో 3 సిక్సర్లు, ఒక ఫోర్ తో 39 పరుగులు చేసి స్కోరు బోర్డును పరుగులు పెట్టించాడు. ఆల్ రౌండర్ హార్దిక్ పాండ్యా (2) విఫలమైనప్పటికీ, తిలక్ వర్మ చివరి వరకు క్రీజులో నిలిచాడు. అతనికి చివర్లో అక్షర్ పటేల్ (15 బంతుల్లో 21) చక్కటి సహకారం అందించాడు. తిలక్ వర్మ కేవలం ఒక్క పరుగు తేడాతో హాఫ్ సెంచరీ చేజార్చుకుని 34 బంతుల్లో 49 పరుగులతో అజేయంగా నిలిచాడు. శ్రీలంక బౌలర్లలో మహీశ్ తీక్షణ, చరిత్ అసలంక సహా ఐదుగురు బౌలర్లు తలో వికెట్ పడగొట్టారు.