ఢిల్లీ కూడా దాటని నీకు యూఎస్ వీసా కావాలా?.. సోషల్ మీడియాలో వైరల్ అయిన ఆఫీసర్ సమాధానం!

విదేశాలకు వెళ్లాలని చాలా మంది కలలు కంటారు. కానీ, అమెరికా వంటి దేశాలకు వెళ్లాలంటే వీసా ఇంటర్వ్యూలో ఎదురయ్యే ప్రశ్నలు, అనుభవాలు కొన్నిసార్లు ఊహించని విధంగా ఉంటాయి. తాజాగా ఇలాంటి ఓ విచిత్ర సంఘటనే సోషల్ మీడియాలో వైరల్ అవుతోంది. అమెరికా టూరిస్ట్ వీసా కోసం వెళ్లిన ఓ వ్యక్తికి "ముందు మీ దేశంలోని పర్యాటక ప్రాంతాలు చూడండి, ఆ తర్వాత మా దేశానికి రావడం గురించి ఆలోచించండి" అని వీసా అధికారి చెప్పినట్లుగా ప్రచారం జరుగుతోంది.

ట్రావెల్ వ్లాగర్ జై ఇన్‌స్టాగ్రామ్‌లో పంచుకున్న ఒక వీడియో ద్వారా ఈ విషయం వెలుగులోకి వచ్చింది. ఆ వీడియోలో ఓ వ్యక్తి తన స్నేహితుడికి ఎదురైన అనుభవాన్ని పంచుకున్నాడు. అతని స్నేహితుడు ఢిల్లీలో పుట్టి పెరిగాడని, యూఎస్ టూరిస్ట్ వీసా ఇంటర్వ్యూకి వెళ్లినప్పుడు అధికారి అతడి ప్రయాణ అనుభవాల గురించి అడిగారని చెప్పాడు. తాను ఢిల్లీ దాటి దేశంలో మరే ఇతర ప్రదేశాన్ని సందర్శించలేదని దరఖాస్తుదారు సమాధానమిచ్చాడు.

దీనికి స్పందించిన వీసా అధికారి "ముందు మీరు మీ సొంత దేశాన్ని చూడండి, ఆ తర్వాత ఇతర దేశాలకు వెళ్లండి" అని సలహా ఇచ్చి వీసాను తిరస్కరించినట్లు ఆ వ్యక్తి వీడియోలో పేర్కొన్నాడు. ఈ వీడియో ఇన్‌స్టాగ్రామ్‌లో వైరల్ కావడంతో నెటిజన్ల నుంచి భిన్నమైన స్పందనలు వస్తున్నాయి. చాలా మంది వీసా అధికారి సలహాను సమర్థించారు. "అధికారి అద్భుతమైన సమాధానం ఇచ్చారు" అని ఒకరు కామెంట్ చేయగా, "భారత్‌లో ఉత్తరాఖండ్, హిమాచల్, కేరళ, లఢక్ వంటి ఎన్నో అందమైన ప్రదేశాలున్నాయి, ముందు వాటిని చూడాలి" అని మరొకరు రాశారు.

అయితే, కొందరు దీన్ని వ్యతిరేకించారు. "ఒకరి ప్రయాణ ఇష్టాలను నిర్దేశించడం సరికాదు, ఇది ఒకరకంగా పురోగతిని అడ్డుకోవడమే" అని మరో యూజర్ అభిప్రాయపడ్డారు. ఇటీవలి కాలంలో యూఎస్ వీసా తిరస్కరణకు సంబంధించిన కథనాలు తరచూ వైరల్ అవుతున్నాయి. కొన్ని రోజుల క్రితం, మంచి ఆర్థిక స్తోమత, ప్రయాణ చరిత్ర ఉన్నప్పటికీ ఓ ఐటీ నిపుణుడికి, అతని తల్లిదండ్రులకు వీసా నిరాకరించిన విషయం కూడా సోషల్ మీడియాలో చర్చనీయాంశమైన సంగతి తెలిసిందే.