జగన్ కట్టిన మెడికల్ కాలేజీ ఇదే... చూడండి: మంత్రి సవిత
- పెనుకొండలో నిలిచిపోయిన వైద్య కళాశాల పనులను పరిశీలించిన సవిత
- 17 కాలేజీలు కట్టామని చెప్పడం జగన్ ప్రచార ఆర్భాటమేనని విమర్శ
- వైసీపీకి కూల్చడమే తెలుసు తప్ప కట్టడం తెలియదని ఎద్దేవా
ఈ సందర్భంగా మంత్రి సవిత మాట్లాడుతూ, తమ హయాంలో 17 వైద్య కళాశాలలు నిర్మించామని జగన్ తన అనుకూల మీడియాలో ప్రచారం చేయించుకోవడం హాస్యాస్పదంగా ఉందని అన్నారు. ఈ అబద్ధాలను చూసి ప్రజలు నవ్వుకుంటున్నారని ఆమె ఎద్దేవా చేశారు. ఇటీవల కూటమి ప్రభుత్వం నిర్వహించిన ‘సూపర్సిక్స్-సూపర్హిట్’ సభ విజయవంతం కావడాన్ని ఓర్వలేకే జగన్ విషం కక్కుతున్నారని విమర్శించారు.
గతంలో ఎంతో ఆర్భాటంగా 17 వైద్య కళాశాలలకు వర్చువల్ విధానంలో శంకుస్థాపన చేసి, వాటన్నింటినీ రెండేళ్లలో పూర్తి చేస్తామని జగన్ గొప్పలు చెప్పారని మంత్రి గుర్తుచేశారు. కానీ, ఐదేళ్ల పాలనలో ఒక్క కళాశాల నిర్మాణాన్ని కూడా పూర్తి చేయలేకపోయారని దుయ్యబట్టారు. వైకాపా నాయకులకు కూల్చడం మాత్రమే తెలుసని, నిర్మాణాలు చేయడం చేతకాదని ఆమె తీవ్రస్థాయిలో విమర్శించారు.
