Manchu Manoj: ఆట, పాట... మరియు ఓ మంచి మాట: మంచు మనోజ్

విలక్షణ నటుడు మంచు మనోజ్ ఓ శక్తివంతమైన పాత్రతో ప్రేక్షకుల ముందుకు రాబోతున్నారు. యంగ్ హీరో తేజ సజ్జా నటిస్తున్న 'మిరాయ్' చిత్రంలో ఆయన ప్రతినాయకుడిగా కనిపించనున్నారు. సినిమా ప్రమోషన్లలో భాగంగా మనోజ్ సోషల్ మీడియాలో పంచుకున్న ఓ వీడియో ఇప్పుడు ఆసక్తికరంగా మారింది. పిల్లలతో కలిసి ఆయన సరదాగా క్రికెట్ ఆడుతున్న దృశ్యాలు ఆ వీడియోలో ఉన్నాయి.

ఈ వీడియోను ట్వీట్ చేస్తూ, సినిమా ప్రమోషన్ల కోసం వైజాగ్‌కు వస్తున్నట్లు మనోజ్ ప్రకటించారు. "ఇవాళ సండే కదా... క్రికెట్ ఆడుతున్నాం. దాంతో పాటే బ్లాక్ స్వోర్డ్ ఇన్విటేషన్ కూడా! వైజాగ్... సిద్ధం ఉన్నారా... రేపు వచ్చేస్తున్నాం. ఆట, పాట.. మరియు ఓ మంచి మాట" అంటూ తనదైన శైలిలో అభిమానులకు సందేశమిచ్చారు. ఈ ట్వీట్‌తో సినిమా ప్రచార కార్యక్రమాలను వేగవంతం చేసినట్లు తెలుస్తోంది.

ఫాంటసీ యాక్షన్ థ్రిల్లర్‌గా రూపొందుతున్న 'మిరాయ్' చిత్రంలో మనోజ్ 'బ్లాక్ స్వోర్డ్' అనే పవర్‌ఫుల్ విలన్ పాత్రను పోషిస్తున్నారు. ఈ సినిమాలో తేజ సజ్జా కథానాయకుడిగా నటిస్తుండగా, సీనియర్ నటి శ్రియ కూడా ఓ ముఖ్యమైన పాత్రలో కనిపించనున్నారు. ఇప్పటికే ఈ సినిమాపై ప్రేక్షకుల్లో భారీ అంచనాలు నెలకొన్నాయి. నిర్మాతలు ఈ చిత్రాన్ని సెప్టెంబర్ 12న ప్రపంచవ్యాప్తంగా విడుదల చేసేందుకు సన్నాహాలు చేస్తున్నారు.