Election Commission of India: రెండు ఓటరు కార్డులు కలిగి ఉండడం నేరం!: కేంద్ర ఎన్నికల సంఘం

దేశవ్యాప్తంగా ఓటర్లకు భారత ఎన్నికల సంఘం (ఈసీఐ) ఒక కీలకమైన హెచ్చరిక జారీ చేసింది. ఒక వ్యక్తి పేరు మీద ఒకటి కంటే ఎక్కువ ఓటర్ గుర్తింపు కార్డులు ఉండటం తీవ్రమైన నేరమని, అలాంటి వాటిని వెంటనే ప్రభుత్వానికి అప్పగించాలని స్పష్టం చేసింది. ఈ నిబంధనను ఉల్లంఘించిన వారిపై కఠిన చట్టపరమైన చర్యలు తీసుకుంటామని తేల్చిచెప్పింది.

ఎన్నికల ప్రక్రియలో పారదర్శకతను కాపాడటంలో భాగంగా ఈసీఐ ఈ నిర్ణయం తీసుకుంది. ఒకే వ్యక్తి బహుళ ఓటు హక్కును వినియోగించుకోవడాన్ని నివారించేందుకే ఈ నిబంధనలను కఠినంగా అమలు చేస్తున్నట్లు పేర్కొంది. ప్రజాప్రాతినిధ్య చట్టం ప్రకారం ఇది శిక్షార్హమైన నేరమని అధికారులు గుర్తు చేస్తున్నారు. ఎన్నికల వ్యవస్థపై ప్రజలకు నమ్మకం కలిగించడమే తమ లక్ష్యమని ఈసీఐ తెలిపింది.

ఈ నేపథ్యంలో, ఓటర్లు తమ పేరు మీద ఎన్ని కార్డులు ఉన్నాయో సరిచూసుకోవాలని ఎన్నికల సంఘం సూచించింది. ఈసీఐ అధికారిక వెబ్‌సైట్‌ను సందర్శించడం ద్వారా గానీ, సమీపంలోని ఎన్నికల కార్యాలయానికి వెళ్లి గానీ తమ వివరాలను తనిఖీ చేసుకోవచ్చు. ఒకవేళ అదనపు కార్డులు ఉన్నట్లు గుర్తిస్తే, నిర్దేశిత పద్ధతిలో వాటిని వెంటనే సరెండర్ చేయాల్సి ఉంటుంది. ఫారం-7ని సమర్పించడం ద్వారా ఒక ఓటరు కార్డు రద్దు చేసుకోవాలని ఈసీ సూచించింది. 

ఆదేశాలను బేఖాతరు చేసి, అదనపు ఓటర్ కార్డులను కలిగి ఉన్న వారిపై చట్టపరమైన చర్యలు తీసుకుంటామని ఎన్నికల సంఘం గట్టిగా హెచ్చరించింది. కాబట్టి, ఓటర్లందరూ బాధ్యతగా వ్యవహరించి, తమ వద్ద ఉన్న అదనపు కార్డులను స్వచ్ఛందంగా అప్పగించి, ఎన్నికల వ్యవస్థ పవిత్రతను కాపాడటంలో సహకరించాలని విజ్ఞప్తి చేసింది.