జీడీపీ హుషారు... లాభాల్లో దూసుకెళ్లిన స్టాక్ మార్కెట్లు

దేశ ఆర్థిక వృద్ధి రేటు అంచనాలను మించి నమోదు కావడంతో దేశీయ స్టాక్ మార్కెట్లు సోమవారం భారీ లాభాలను సొంతం చేసుకున్నాయి. ముఖ్యంగా ఐటీ, ఆటోమొబైల్ రంగాల షేర్లలో పెద్ద ఎత్తున కొనుగోళ్లు జరగడంతో సూచీలు పరుగులు పెట్టాయి. అంతర్జాతీయంగా మిశ్రమ సంకేతాలు ఉన్నప్పటికీ, మన దేశ జీడీపీ గణాంకాలు ఇన్వెస్టర్లలో కొత్త ఉత్సాహాన్ని నింపాయి.

ట్రేడింగ్ ముగిసే సమయానికి, బీఎస్ఈ సెన్సెక్స్ 554.84 పాయింట్లు లాభపడి 80,364.49 వద్ద స్థిరపడింది. అదేవిధంగా, ఎన్ఎస్ఈ నిఫ్టీ 198.20 పాయింట్లు వృద్ధి చెంది 24,625.05 వద్ద ముగిసింది. ఉదయం ఫ్లాట్‌గా ప్రారంభమైనప్పటికీ, కొద్దిసేపటికే పుంజుకున్న మార్కెట్లు రోజంతా లాభాల బాటలోనే పయనించాయి. సెన్సెక్స్ ఒక దశలో 80,406.84 వద్ద ఇంట్రా-డే గరిష్ఠాన్ని తాకింది.

ప్రస్తుత ఆర్థిక సంవత్సరం మొదటి త్రైమాసికంలో (Q1 FY26) భారత జీడీపీ 7.8 శాతం వృద్ధి రేటు సాధించడం మార్కెట్ సెంటిమెంట్‌ను గణనీయంగా బలపరిచింది. ప్రపంచవ్యాప్తంగా నెలకొన్న ఆర్థిక అనిశ్చితి మధ్య కూడా దేశ ఆర్థిక వ్యవస్థ పటిష్టంగా ఉందని ఈ గణాంకాలు ఇన్వెస్టర్లకు భరోసా ఇచ్చాయి. దీనికి తోడు, రాబోయే జీఎస్టీ కౌన్సిల్ సమావేశంలో పన్నుల హేతుబద్ధీకరణపై సానుకూల నిర్ణయాలు రావొచ్చన్న అంచనాలు కూడా మార్కెట్‌కు కలిసొచ్చాయి.

రంగాల వారీగా చూస్తే, నిఫ్టీ ఆటో సూచీ 2.80 శాతం, నిఫ్టీ ఐటీ సూచీ 1.59 శాతం చొప్పున భారీగా పెరిగాయి. వీటితో పాటు బ్యాంకింగ్, ఫైనాన్షియల్ సర్వీసెస్ సూచీలు కూడా లాభపడ్డాయి. బ్రాడర్ మార్కెట్లోనూ కొనుగోళ్ల జోరు స్పష్టంగా కనిపించింది. నిఫ్టీ మిడ్‌క్యాప్ 100 సూచీ 1.97 శాతం, స్మాల్‌క్యాప్ 100 సూచీ 1.57 శాతం చొప్పున లాభాలను అందుకున్నాయి.

సెన్సెక్స్ షేర్లలో మహీంద్రా అండ్ మహీంద్రా, టాటా మోటార్స్, అదానీ పోర్ట్స్, ఇన్ఫోసిస్, టెక్ మహీంద్రా, ఏషియన్ పెయింట్స్, బజాజ్ ఫిన్‌సర్వ్, యాక్సిస్ బ్యాంక్, పవర్‌గ్రిడ్ షేర్లు ప్రధానంగా లాభపడ్డాయి. మరోవైపు సన్ ఫార్మా, ఐటీసీ, హిందుస్థాన్ యూనిలీవర్ షేర్లు స్వల్పంగా నష్టపోయిన వాటిలో ఉన్నాయి.