BCCI: ఆసియా కప్ టెన్షన్.. స్పాన్సర్ కోసం బీసీసీఐ పరుగులు

భారత క్రికెట్ జట్టు ప్రధాన స్పాన్సర్‌గా ఉన్న ప్రముఖ స్పోర్ట్స్-టెక్ సంస్థ డ్రీమ్11 అర్ధాంతరంగా వైదొలగడంతో భారత క్రికెట్ నియంత్రణ మండలి (బీసీసీఐ) కొత్త స్పాన్సర్ కోసం వేట ముమ్మరం చేసింది. త్వరలో ఆసియా కప్ 2025 ప్రారంభం కానుండటంతో వీలైనంత త్వరగా కొత్త భాగస్వామిని ఖరారు చేయాలని బోర్డు తీవ్రంగా ప్రయత్నిస్తోంది.

పార్లమెంటులో ఆన్‌లైన్ గేమింగ్ బిల్లు ఆమోదం పొందడమే డ్రీమ్11 తమ ఒప్పందం నుంచి తప్పుకోవడానికి ప్రధాన కారణంగా తెలుస్తోంది. వాస్తవానికి మూడేళ్ల కాలానికి గానూ రూ. 358 కోట్లతో బీసీసీఐతో డ్రీమ్11 ఒప్పందం కుదుర్చుకుంది. కానీ, ఒప్పందం ప్రారంభమైన రెండేళ్ల లోపే దీనికి ముగింపు పలకాల్సి వచ్చింది. ఈ అనూహ్య పరిణామంతో, బీసీసీఐ ఇప్పుడు 2025 నుంచి 2028 వరకు కొత్త స్పాన్సర్‌ను దక్కించుకోవడంపై దృష్టి సారించింది. ఈసారి ఒప్పందం విలువను సుమారు రూ. 450 కోట్లకు పెంచాలని బోర్డు లక్ష్యంగా పెట్టుకున్నట్టు ఎన్‌డీటీవీ వర్గాలు వెల్లడించాయి.

ఈ మూడేళ్ల కాలంలో టీమిండియా స్వదేశంలో, విదేశాల్లో ఆడే ద్వైపాక్షిక సిరీస్‌లతో పాటు, ఆసియా క్రికెట్ కౌన్సిల్ (ఏసీసీ), అంతర్జాతీయ క్రికెట్ మండలి (ఐసీసీ) ఆధ్వర్యంలో జరిగే టోర్నమెంట్లు కలిపి మొత్తం 140 మ్యాచ్‌లకు ఈ స్పాన్సర్‌షిప్ వర్తిస్తుంది. ద్వైపాక్షిక మ్యాచ్‌లకు రూ. 3.5 కోట్లు, ఐసీసీ, ఏసీసీ టోర్నీల్లోని మ్యాచ్‌లకు రూ. 1.5 కోట్లు చొప్పున ధరను బీసీసీఐ నిర్దేశించినట్టు సమాచారం. ఈ మొత్తం డ్రీమ్11 చెల్లించిన దానికంటే ఎక్కువైనప్పటికీ, అంతకుముందు స్పాన్సర్‌గా ఉన్న బైజూస్ ఇచ్చిన మొత్తం కంటే తక్కువే కావడం గమనార్హం.

ప్రస్తుతం ఆసియా కప్ నాటికి టీమిండియా జెర్సీలపై కొత్త స్పాన్సర్ పేరును ముద్రించడం సవాలుగా మారింది. సమయం తక్కువగా ఉండటంతో కొంత జాప్యం జరిగే అవకాశం ఉందని భావిస్తున్నారు. అయితే, ఈ ఏడాది సెప్టెంబర్ 30న ప్రారంభమయ్యే మహిళల ప్రపంచ కప్ లోపు కొత్త స్పాన్సర్‌ను ఖాయం చేసుకుంటామని బీసీసీఐ వర్గాలు ధీమా వ్యక్తం చేస్తున్నాయి.