NTR: ఎన్టీఆర్ క్రేజ్ పనిచేయలేదా?.. బాక్సాఫీస్ వద్ద చతికిలపడ్డ ‘వార్2’ వసూళ్లు!

బాలీవుడ్ స్టార్ హృతిక్ రోషన్, యంగ్ టైగర్ ఎన్టీఆర్ కలిసి నటించిన భారీ యాక్షన్ చిత్రం ‘వార్ 2’ బాక్సాఫీస్ వద్ద అంచనాలను అందుకోవడంలో తడబడుతోంది. భారీ అంచనాల మధ్య విడుదలైన ఈ సినిమాకు మిశ్రమ స్పందన రావడంతో కలెక్షన్లపై ఆ ప్రభావం స్పష్టంగా కనిపిస్తోంది. తొలి ఐదు రోజుల్లో ఈ చిత్రం దేశవ్యాప్తంగా అన్ని భాషల్లో కలిపి రూ. 183.25 కోట్లు మాత్రమే వసూలు చేసి, ట్రేడ్ వర్గాలను నిరాశపరిచింది.

ప్రముఖ ట్రేడ్ వెబ్‌సైట్ సాక్‌నిల్క్ అందించిన సమాచారం ప్రకారం ఈ సినిమా సోమవారం అన్ని భాషల్లో కేవలం రూ. 8.50 కోట్లు మాత్రమే రాబట్టింది. ఆదివారం రూ. 32.15 కోట్లు వసూలు చేసిన చిత్రం ఒక్క రోజు వ్యవధిలోనే ఇంత భారీగా పడిపోవడం గమనార్హం. సినిమాకు మొదట్లో తెలుగు వెర్షన్ నుంచి మంచి వసూళ్లు వచ్చినప్పటికీ, వారాంతానికి వచ్చేసరికి తెలుగు రాష్ట్రాల్లో కలెక్షన్లు గణనీయంగా తగ్గినట్లు నివేదికలు చెబుతున్నాయి.

ఈ సినిమా విడుదల రోజున హిందీలో రూ. 44.5 కోట్లు సాధించగా, శనివారం నాటికి అది రూ. 26 కోట్లకు పడిపోయింది. రూ. 400 కోట్ల భారీ బడ్జెట్‌తో తెరకెక్కిన ఈ చిత్రంతో ఎన్టీఆర్ బాలీవుడ్‌లోకి అడుగుపెట్టాడు. అయితే, ఈ సినిమాకు రజనీకాంత్ నటించిన ‘కూలీ’ నుంచి గట్టి పోటీ ఎదురవుతోంది. అంతేకాకుండా వైఆర్ఎఫ్ స్పై యూనివర్స్‌లోనే ఇది ‘అత్యంత బలహీనమైన చిత్రం’ అంటూ సోషల్ మీడియాలో కొందరు విమర్శిస్తుండటం కూడా వసూళ్లపై ప్రభావం చూపుతున్నట్లు తెలుస్తోంది.

ఈ ఏడాది హిందీలో విక్కీ కౌశల్ ‘ఛావా’ తర్వాత రెండో అతిపెద్ద ఓపెనర్‌గా నిలిచినప్పటికీ, ‘వార్ 2’ ఆ జోరును కొనసాగించలేకపోయింది. అయాన్ ముఖర్జీ దర్శకత్వం వహించిన ఈ యాక్షన్ థ్రిల్లర్‌లో కియారా అద్వానీ కీలక పాత్రలో నటించారు. యశ్‌రాజ్ ఫిలింస్ నిర్మించిన ఈ చిత్రం 2019లో వచ్చిన బ్లాక్‌బస్టర్ ‘వార్’కు సీక్వెల్‌గా ప్రేక్షకుల ముందుకు వచ్చింది.