భారత్ లో తొలి అడ్వెంచర్ స్కూటర్... బైక్‌లకు పోటీ.. డీటెయిల్స్ ఇవిగో!

భారతదేశ ద్విచక్ర వాహన మార్కెట్లోకి హోండా సంస్థ ఒక సరికొత్త వాహనాన్ని ప్రవేశపెట్టింది. ఎంతోకాలంగా ఎదురుచూస్తున్న హోండా ఎక్స్-ఏడీవీ 750 (Honda X-ADV 750) అడ్వెంచర్ స్కూటర్‌ను దేశీయ మార్కెట్లో విడుదల చేసింది. భారతదేశంలో ఈ తరహా అడ్వెంచర్ స్కూటర్ రావడం ఇదే తొలిసారి కావడం విశేషం. శక్తివంతమైన ఇంజిన్, ఆకర్షణీయమైన అడ్వెంచర్ స్టైలింగ్‌తో వస్తున్న ఈ స్కూటర్, వాహన ప్రియులను ఎంతగానో ఆకట్టుకుంటుందని సంస్థ భావిస్తోంది. కొన్నేళ్ల క్రితం కాన్సెప్ట్ రూపంలో చూసిన ఈ వాహనం ఇప్పుడు భారతీయ రోడ్లపై పరుగులు పెట్టనుంది.

నిర్మాణం మరియు ఆకర్షణీయమైన డిజైన్

హోండా ఎక్స్-ఏడీవీ 750 స్కూటర్‌ను స్టీల్ ట్యూబులర్ ఫ్రేమ్‌పై నిర్మించారు. దీని డిజైన్ పూర్తిస్థాయి అడ్వెంచర్ టూరర్‌ను తలపిస్తుంది. గతంలో హీరో జూమ్ 160 వంటి కొన్ని స్కూటర్లు టూరర్ లుక్స్‌తో వచ్చినప్పటికీ, ఎక్స్-ఏడీవీ 750 మాత్రం నిజమైన అడ్వెంచర్ స్కూటర్‌గా నిలుస్తుంది. ముందు భాగంలో డీఆర్‌ఎల్‌లతో కూడిన జంట హెడ్‌లైట్లు, గాలిని సమర్థంగా ఎదుర్కొనేలా పొడవైన విండ్‌స్క్రీన్, సౌకర్యవంతమైన రైడింగ్ కోసం వెడల్పాటి హ్యాండిల్‌బార్ వంటివి అమర్చారు. దీనికి తోడు, పక్కకు అమర్చిన అప్‌స్వెప్ట్ ఎగ్జాస్ట్, నకిల్ గార్డులు, పెద్ద సీటు దీని అడ్వెంచర్ లుక్‌ను మరింత పెంచుతున్నాయి. చూడటానికి అడ్వెంచర్ మోటార్‌సైకిల్‌లా ఉన్నా, స్కూటర్ సౌకర్యాన్ని అందించడం దీని ప్రత్యేకత.

అధునాతన పరికరాలు, ఫీచర్లు

సాంకేతిక పరికరాల విషయానికొస్తే, హోండా ఎక్స్-ఏడీవీ 750లో అత్యాధునిక ఫీచర్లను పొందుపరిచారు. ముందు వైపు యూఎస్‌డీ ఫోర్కులు, వెనుక వైపు మోనోషాక్ సస్పెన్షన్ వ్యవస్థను అమర్చారు. ట్యూబ్‌లెస్ వైర్-స్పోక్ వీల్స్, ముందు 17-అంగుళాలు, వెనుక 15-అంగుళాల డ్యూయల్ పర్పస్ టైర్లతో వస్తుంది. పూర్తిస్థాయి టీఎఫ్‌టీ ఇన్‌స్ట్రుమెంట్ కన్సోల్, ఎల్ఈడీ లైటింగ్ వ్యవస్థ, రెండు చక్రాలకు డిస్క్ బ్రేకులు వంటివి దీనిలో ఉన్నాయి.

ఇక ఫీచర్ల పరంగా చూస్తే, ఇందులో క్రూయిజ్ కంట్రోల్, డ్యూయల్-ఛానల్ ఏబీఎస్, వివిధ రకాల రైడ్ మోడ్స్, హోండా సెలెక్టబుల్ టార్క్ కంట్రోల్ (HSTC), బ్లూటూత్ కనెక్టివిటీ, నావిగేషన్ సదుపాయం, యూఎస్‌బీ-సీ ఛార్జింగ్ పోర్ట్ వంటి అనేక సౌకర్యాలు కల్పించారు. సీటు కింద 22 లీటర్ల విశాలమైన స్టోరేజ్ స్పేస్ కూడా అందుబాటులో ఉంది.

క్తివంతమైన ఇంజిన్, గేర్‌బాక్స్

హోండా ఎక్స్-ఏడీవీ 750 స్కూటర్‌కు ప్రధాన ఆకర్షణ దాని ఇంజిన్. ఇందులో 745సీసీ, లిక్విడ్-కూల్డ్, ప్యారలల్-ట్విన్ ఇంజిన్‌ను ఉపయోగించారు. ఈ ఇంజిన్ 58 బీహెచ్‌పీ శక్తిని, 67 ఎన్ఎమ్ టార్క్‌ను ఉత్పత్తి చేస్తుంది. ఈ శక్తివంతమైన ఇంజిన్‌కు డ్యూయల్-క్లచ్ ట్రాన్స్‌మిషన్ (DCT)ను జతచేశారు. భారతదేశంలో ఒక స్కూటర్‌లో డీసీటీ గేర్‌బాక్స్ రావడం ఇదే మొదటిసారి. ప్రస్తుతం భారత మార్కెట్లో ఈ అడ్వెంచర్ స్కూటర్‌కు ప్రత్యక్ష పోటీ లేనప్పటికీ, కొన్ని అడ్వెంచర్ బైక్‌లకు గట్టి పోటీ ఇచ్చే అవకాశం ఉందని నిపుణులు అంచనా వేస్తున్నారు.

ధర మాత్రం మామూలుగా లేదు. ఈ హోండా ఎక్స్ ఏడీవీ-750 స్కూటర్ ఎక్స్ షోరూమ్ ధర రూ.11,90,000.