Pawan Kalyan: ఉగ్రవాదంపై పోరులో ప్రధాని మోదీకి అండగా ఉంటాం: ఉప ముఖ్యమంత్రి పవన్ కల్యాణ్

దేశంలో ఉగ్రవాద కార్యకలాపాలను ఉపేక్షించేది లేదని, పాకిస్థాన్ ప్రేరేపిత ఉగ్రవాదానికి తగిన రీతిలో బుద్ధి చెప్పాల్సిన సమయం ఆసన్నమైందని ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్ స్పష్టం చేశారు. ఉగ్రవాదంపై పోరులో ప్రధానమంత్రి నరేంద్ర మోదీ తీసుకునే ప్రతి సాహసోపేత నిర్ణయానికి తమ సంపూర్ణ మద్దతు ఉంటుందని ఆయన పునరుద్ఘాటించారు.  తన నివాసంలో నేడు ఏర్పాటు చేసిన మీడియా సమావేశంలో ఆయన పలు కీలక అంశాలపై మాట్లాడారు.

కశ్మీర్ భారతదేశంలో అంతర్భాగమన్నది కాదనలేని సత్యమని పవన్ కల్యాణ్ పేర్కొన్నారు. ఉగ్రవాదులకు ఆశ్రయం కల్పిస్తున్న పాకిస్థాన్‌కు గట్టి గుణపాఠం చెప్పాలని, ఇది పూర్తిస్థాయి యుద్ధం కాకపోయినా, సుదీర్ఘకాలం కొనసాగే పోరాటమని ఆయన అభిప్రాయపడ్డారు. మన సైనిక, రక్షణ సిబ్బంది చేస్తున్న సేవలను ప్రశంసించిన పవన్, దేశ రక్షణ విషయంలో వారికి అండగా నిలవాల్సిన బాధ్యత ప్రతి పౌరుడిపైనా ఉందన్నారు. "గౌరవ ప్రధానమంత్రి మోదీ గారి నాయకత్వంలో, మీరు తీసుకునే ప్రతి నిర్ణయానికి, ప్రతి సాహసోపేత చర్యకు మేమంతా అండగా ఉంటాం" అని పవన్ కల్యాణ్ కేంద్ర ప్రభుత్వానికి, సైన్యానికి భరోసా ఇచ్చారు.

సోషల్ మీడియాలో జరిగే దేశ వ్యతిరేక ప్రచారంపై ఆయన తీవ్ర ఆందోళన వ్యక్తం చేశారు. "సోషల్ మీడియాలో ఏ విధమైన దేశ వ్యతిరేక ప్రచారం జరిగినా, దాన్ని తిప్పికొట్టాలి. అలాంటి వాటిని సంబంధిత సైబర్ క్రైమ్ విభాగాల దృష్టికి తీసుకెళ్లి కేసులు నమోదు చేయించాలి" అని ప్రజలకు పిలుపునిచ్చారు. ఆంధ్రప్రదేశ్ రాష్ట్రం నుంచి ఎవరైనా దేశ వ్యతిరేక కార్యకలాపాలకు పాల్పడితే, లేదా ఈ యుద్ధ వాతావరణానికి వ్యతిరేకంగా మాట్లాడితే కఠిన చర్యలు తీసుకోవాలని రాష్ట్ర డీజీపీకి ఇప్పటికే సూచించినట్లు ఆయన వెల్లడించారు. "దేశం లోపలైనా, బయటి నుంచి అయినా దేశంపై జరిగే ఏ దాడిని అయినా తీవ్రంగా పరిగణిస్తాం" అని హెచ్చరించారు.

సెలబ్రిటీలు, సోషల్ మీడియా ఇన్‌ఫ్లుయెన్సర్లు జాతీయ భద్రత, సైన్యం వంటి సున్నితమైన అంశాలపై అవగాహన లేకుండా వ్యాఖ్యలు చేయవద్దని పవన్ కల్యాణ్ హితవు పలికారు. బాధ్యతా రహితంగా మాట్లాడే వారిపై కఠిన చర్యలు తప్పవని హెచ్చరించారు. "దేశ సరిహద్దులను ఎలా కాపాడుకోవాలో తెలియకుండా, సోషల్ మీడియాలో అనవసర వ్యాఖ్యలు చేయవద్దు. ఇది నా విజ్ఞప్తి" అని ఆయన అన్నారు.

ఆంధ్రప్రదేశ్‌కు 974 కిలోమీటర్ల పొడవైన తీరప్రాంతం ఉందని, గతంలో విశాఖపట్నం తీరం వరకు పాకిస్థాన్ గజనీ సబ్‌మెరైన్ వచ్చిన ఘటనను గుర్తు చేస్తూ, తీరప్రాంత భద్రత విషయంలో అప్రమత్తంగా ఉండాల్సిన అవసరం ఉందని పవన్ నొక్కిచెప్పారు. "గత యుద్ధాల సమయంలో ఇలాంటి ఘటనలు జరిగాయి. కాబట్టి తీరప్రాంత ప్రజలు అప్రమత్తంగా ఉండాలి" అని సూచించారు.

ఉగ్రవాద దాడులపై కాంగ్రెస్ నేత మల్లికార్జున ఖర్గే చేసిన వ్యాఖ్యలను పవన్ కల్యాణ్ ప్రస్తావిస్తూ, దాడికి మూడు రోజుల ముందే సమాచారం ఉందని తెలిస్తే ఇన్నాళ్లూ ఎందుకు మౌనంగా ఉన్నారని ప్రశ్నించారు. "ఆ సమాచారం నిజంగానే ఉంటే, అప్పుడే మీడియా ముందు ఎందుకు వెల్లడించలేదు? కొంతకాలం తర్వాత, బాగా ఆలోచించి ఇప్పుడు ఎందుకు ఈ వ్యాఖ్యలు చేస్తున్నారు?" అని పవన్ నిలదీశారు. కాంగ్రెస్ నేతల వైఖరిలో స్పష్టత కొరవడిందని విమర్శించారు.

ఉగ్రవాదాన్ని పూర్తిగా నిర్మూలించాల్సిన అవసరం ఉందని, ఇజ్రాయెల్ తరహాలో నిర్ణయాత్మక చర్యలు తీసుకోవడమే దీనికి మార్గమని పవన్ అభిప్రాయపడ్డారు. రోహింగ్యాల వలసల అంశాన్ని ప్రస్తావిస్తూ, మానవతా దృక్పథంతో వలసలను అర్థం చేసుకోవచ్చని, అయితే స్థానికుల ఉద్యోగాలు, వనరులపై ప్రభావం పడితే భవిష్యత్తులో సమస్యలు తలెత్తుతాయని అన్నారు. తెలంగాణ రాష్ట్ర ఏర్పాటు ఉద్యమానికి దారితీసిన పరిస్థితులను ఆయన ఉదాహరణగా చూపారు. "ప్రతి దేశం తమ సరిహద్దులను కాపాడుకోవాలి, తమ పౌరుల అభివృద్ధికి ప్రాధాన్యత ఇవ్వాలి. భారతదేశం అభివృద్ధి చెందుతోందని ఇతర దేశాలు తమ పౌరులను ఇక్కడికి పంపించడాన్ని మనం భరించలేం" అని పవన్ కల్యాణ్ స్పష్టం చేశారు.

దేశాన్ని నడిపేది రాజకీయ నాయకులే తప్ప సెలబ్రిటీలు కాదని, సెలబ్రిటీలకు అనవసర ప్రాధాన్యత ఇవ్వాల్సిన అవసరం లేదని పవన్ అన్నారు. దేశ సమస్యలు, క్షేత్రస్థాయి పరిస్థితులపై అవగాహన ఉన్న రాజకీయ నాయకులే దేశాన్ని నడిపిస్తారని ఆయన పేర్కొన్నారు. చివరి ఉగ్రవాదిని దేశం నుంచి ఏరివేసే వరకు ఈ పోరాటం కొనసాగుతుందని, ఈ విషయంలో తామంతా కేంద్ర ప్రభుత్వానికి అండగా ఉంటామని పవన్ కల్యాణ్ పునరుద్ఘాటించారు.